ආසියානු කුසලාන කාන්තා T20 තරගාවලියේ ශ්‍රී ලංකාව මුහුණදුන් පළමු තරගය ඊයේ පැවැත්වුණා. ඒ එක්සත් අරාබි එමීර් රාජ්‍යයට එරෙහිවයි.
පළමුව පන්දුවට පහරදුන් එක්සත් අරාබි එමීර් කණ්ඩායමේ සියලු කඩුලු ලකුණු 79ට දවාගැනීමට ශ්‍රී ලංකා පන්දුයැවීමේ බලකාය සමත් වුණා.
මිතාලි අයෝධ්‍යා ලකුණු 14ට කඩුලු 3ක්, චේතනා විමුක්ති ලකුණු 16ට කඩුලු 3ක් හා සුගන්ධිකා කුමාරි ලකුණු 18ට කඩුලු 2ක් දවාගැනීමට සමත් වුණා.
එක්සත් අරාබි කණ්ඩායමේ ඉනිම වෙනුවෙන් ක්‍රීඩිකාවක් ලබාගත් වැඩිම ලකුණු සංඛ්‍යාව වූයේ නායක ඊෂා ඔසා ලබාගත් ලකුණු 18 යි.
ලකුණු 80ක පහසු ඉලක්කය හඹාගිය ශ්‍රී ලංකා පිතිකරුවන් එක් කඩුල්ලක් පමණක් දැවී 8වන පන්දුවාරයේදී තරගයේ ජයග්‍රහණය ලබාගත්තා.
චමරි අතපත්තු නොදැවී ලකුණු 48ක් ලබාගත් අතර ඉමේෂා දුලානි ලකුණු 25ක් ලබාසිටියදී දුවද්දී දැවී ගියා.
ශ්‍රී ලංකා කණ්ඩායම තරගවදින මීළඟ තරගය ඉන්දුනීසියාවට එරෙහිව ලබන 2 වැනි දා පැවැත්වීමට නියමිතයි.
