ලෝක කුසලාන කාන්තා එක්දින ක්‍රිකට් තරගාවලියේ ශ්‍රී ලංකාව සමග පැවැති තරගය කඩුලු 10 කින් ජය ගැනීමට දකුණු අප්‍රිකාව සමත් වුණා.
තරගය පැවැත්වුණේ කොළඹ ආර් ප්‍රේමදාස ක්‍රීඩාංගණයේදීයි.
කාසියේ වාසිය හිමි කර ගත් ශ්‍රී ලංකාව පළමුවෙන් පන්දුවට පහර දීමට තීරණය කළා.
ශ්‍රී ලංකා කණ්ඩායම පන්දු වාර 12 ක් ඇතුලත කඩුලු 2 ක් දැවී ලකුණු 46 ක් ලබා සිටියදී තරගයට වර්ශාවෙන් බාධා එල්ල වුණා.
අනතුරුව රාත්‍රී 9.10 තරගය යළි ආරම්භ කෙරුණේ එක් ඉනිමක් පන්දු වාර 20 කට සීමා කරමින්.
තරගය යළි ආරම්භ කරන විට නොදැවී පන්දුවට පහර දෙමින් සිටියේ කවීෂා දිල්හාරි සහ හර්ෂාතා සමරවික්‍රම.
කවීෂා ලකුණු 14 කට දැවී ගිය අතර හර්ෂිතා ලකුණු 13 යි.
ශ්‍රී ලංකා කණ්ඩායම පන්දු වාර 20 ඇතුළත කඩුලු 7 ක් දැවී ලකුණු 105 ක් රැස් කළා.
විශ්මි ගුණරත්න ලකුණු 34 ක් ලබා ගත්තා.
නිලක්ෂ් සිල්වා ලකුණු 18 යි.
ඩක්වත් සහ ලුවිස් න්‍යායට අනුව තරගය ජය ගැනීම සදහා දකුණු අප්‍රිකා කණ්ඩායමට පන්දු වාර 20 ඇතුළත හිමිවූ ඉලක්කය ලකුණු 121ක්.
ඔවුන්ගේ ඉනිම ආරම්භ කළේ නායිකා ලවුරා වොල්වර්ට් සහ ටස්මින් බ්‍රිට්ස්.
තම එක්දින ක්‍රිකට් දිවියේ 37 වැනි අර්ධ ශතකය වාර්තා කිරීමට ලවුරා වොල්වර්ට් සමත් වුණා.
දකුණු අප්‍රිකාව තරගය ජය ගත්තේ පන්දු වාර 14 යි පන්දු 5 කදී කිසිදු කඩුල්ලක් නොදැවී ලකුණු 126 ක් රැස් කරමින්.
ලවුරා වොල්වර්ට් නොදැවී ලකුණු 60 ක් සහ ටස්මින් බ්‍රිට්ස් නොදැවී ලකුණු 55 ක් රැස් කළා.
මෙම ජයග්‍රහණයත් සමග දකුණු අප්‍රිකාව ලකුණු 8 ක් සමග ප්‍රසාද ලකුණු සටහනේ දෙවැනි ස්ථානය දක්වා ඉදිරියට පැමිණියා
