ශූරයින්ගේ කුසලානය එක්දින ක්‍රිකට් තරගාවලියේ අවසන් තරගය අද ඩුබායි අන්තර්ජාතික ක්‍රිකට් ක්‍රීඩාංගනයේදී පැවැත්වෙනවා. ඒ, ඉන්දියාව සහ නවසීලන්ත කණ්ඩායම් අතරයි.
රෝහිත් ශර්මාගේ නායකත්වයෙන් ඉන්දීය කණ්ඩායම තරගවදින අතර, නවසීලන්ත කණ්ඩායමට නායකත්වය ලබා දෙන්නේ, මිචෙල් සැට්නර්. ඉන්දියාව සහ නවසීලන්තය අතර මෙතෙක් පවත්වා ඇති එක්දින තරග සංඛ්‍යාව 119 ක්.
ඉන් තරග 61 ක් ඉන්දියාව ජය ගෙන ඇති අතර, තරග 50 ක් නවසීලන්ත කණ්ඩායම ජය ගෙන තිබෙනවා.
තරග 7 ක් අවසන් වී ඇත්තේ, තීරණයකින් තොරවයි. එක් තරගයක් ලකුණු සමවීමෙන් අවසන් වී තිබෙනවා.
ඩුබායි අන්තර් ජාතික ක්‍රිකට් ක්‍රීඩාංගනයේදී දෙරට අතර එක් තරගයක් පවත්වා ඇති අතර, එහි ජය ඉන්දියාව සතු කර ගෙන තිබෙනවා. මීට පෙර ඉන්දියාව ශූරයින්ගේ කුසලානය දෙවතාවක් හිමි කර ගෙන තිබෙනවා.
ඒ, 2002 සහ 2013 යන වසරවලදී. ඉන් 2002 වසරේදී ඉන්දියාව සහ ශ්‍රී ලංකාව සම ශූරයින් වී තිබෙනවා. නවසීලන්තය මින් පෙර 2000 වසරේදී ශූරයින්ගේ කුසලානය හිමි කර ගෙන තිබෙනවා.
මෙවර ශූරයින්ගේ කුසලානය එක්දින ක්‍රිකට් තරගාවලියේ අවසන් තරගය අද පස්වරු 2.30 ට ආරම්භ වීමට නියමිතයි.
