2026 පන්දුවාර 20/20 ලෝක කුසලාන ක්‍රිකට් තරගාවලියේ තරග කාල සටහනේ වෙනසක් සිදු නොකරන බවත්, තරගාවලිය සැලසුම් කළ පරිදි පවත්වන බවටත් අන්තර්ජාතික ක්‍රිකට් කවුන්සිලය අද නිවේදනය කළා.
ඒ, අන්තර්ජාතික ක්‍රිකට් කවුන්සිලයේ මණ්ඩල සාමාජිකයන් අතර පැවැති සාකච්ඡාවකින් අනතුරුවයි.
බංග්ලාදේශය 2026 පන්දුවාර 20/ 20 ලෝක කුසලාන තරග ඉන්දියාවේදී ක්‍රීඩා කිරීම ප්‍රතික්ෂේප කිරීම සම්බන්ධයෙන් අන්තර්ජාලය ඔස්සේ මෙම සාකච්ඡාව සිදු වූ බව අන්තර්ජාතික ක්‍රිකට් කවුන්සිල නිල වෙබ් අඩවියේ සඳහන්.
එහි වැඩි දුරටත් දැක්වෙන්නේ ක්‍රීඩකයින්ගේ සහ මාධ්‍යවේදීන් ඇතුළු අනෙකුත් පාර්ශවයන්ගේ ආරක්ෂාව සම්බන්ධයෙන් කිසිදු තර්ජනයක් නොමැති බවට තහවුරු වීම නිසා අන්තර්ජාතික ක්‍රිකට් කවුන්සිලය මෙම තීරණයට එළැඹ ඇති බවයි.
තරගාවලියට සහභාගී වීම සම්බන්ධව තීරණයක් ගැනීමට බංග්ලාදේශ රජයට පැය 24ක කාලයක් ලබා දුන් බව ජාත්‍යන්තර ක්‍රිකට් කවුන්සිලය නිල වශයෙන් බංග්ලාදේශ ක්‍රිකට් පාලක මණ්ඩලය වෙත දන්වා තිබෙනවා.
තහවුරු කරන ලද කාලසටහනට අනුව ඉන්දියාවේ දී ක්‍රීඩා කිරීමට එකඟ නොවුනහොත් බංග්ලාදේශය වෙනුවට ස්කොට්ලන්තයට ලෝක කුසලානය ක්‍රීඩා කිරීමට අවස්ථාව හිමිවනු ඇතියි
තරගාවලිය ඉන්දියාවේ සහ ශ්‍රී ලංකාවේ සත්කාරකත්වයෙන් ලබන මස 7 වැනිදා ආරම්භ වීමට නියමිතයි.
