නැගී එන ආසියානු කුසලාන 20-20 ක්‍රිකට් තරගාවලියේ ශූරතාව හිමි කර ගැනීමට පාකිස්තාන් ශහීන්ස් කණ්ඩායම සමත් වුණා.
ඒ, අවසන් තරගයේදී බංග්ලාදේශ ඒ කණ්ඩායම පරාජය කරමින්.
දෝහාකටාර්හි පැවැති තරගාවලියේ අවසන් තරගය ඊයේ පැවැත්වුණා.
පළමුවෙන් පන්දුවට පහර දුන් පාකිස්තාන් ශහීන්ස් කණ්ඩායම පන්දුවාර 20 ඇතුළත සියලු ක්‍රීඩකයින් දැවී ලකුණු 125 ක් රැස් කළා. සාද් මසූඩ් ලකුණු 38 යි.
පන්දු යැවීමේදී රිපොන් මොන්ඩෝල් කඩුලු 3 ක් සහ රකිබුල් හසන් කඩුලු 2 ක් බිඳහෙලුවා.
පිළිතුරු ලෙස බංග්ලාදේශ කණ්ඩායමට පන්දුවාර 20 ඇතුළත කඩුලු 9 ක් දැවී ලකුණු 125 ක් රැස් කළා. වැඩිම ලකුණු ලාභියා වූ හබිබර් රහමාන් ලකුණු 26 යි.
පන්දු යැවීමේදී සුෆියන් මකීම් කඩුලු 3 ක් බිදහෙලුවා.
දෙපිලේම ලකුණු සම වීම හේතුවෙන් ජය පරාජය තීරණය කිරීමට සුපිරි පන්දුවාරය බැගින් ලබා දුන්නා.
ඒ අනුව, පළමුවෙන් පන්දුවට පහර දුන් බංග්ලාදේශ ඒ කණ්ඩායම ලකුණු 6 ක් රැස් කළා.
පකිස්ථාන් ශහීන්ස් කණ්ඩායම පන්දු 4 කදී ලකුණු 7 ක් රැස් කරමින්, අවසන් තරගය ජය ගැනීමට සමත් වුණා.
ඒ අනුව, නැගී එන ආසියානු ක්‍රිකට් කරුළ පකිස්ථාන් ශහීන්ස් කණ්ඩායම සතු කර ගත්තා.
