මේ දිනවල ක්‍රීඩා කරන පාකිස්තාන් සුපර් ලීග් තරගාවලියේ (PSL) පෙෂාවර් සල්මි කණ්ඩායම නියෝජනය කරන කුසල් මෙන්ඩිස් ඊයේ කරච්චි කිංග්ස් කණ්ඩායමට එරෙහිව ශතකයක් වාර්තා කළ අතර ඒ ශ්‍රී ලංකා ක්‍රීඩකයෙක් PSL තරගාවලියේදී රැස්කළ ප්‍රථම ශතකයයි.
පළමුවෙන් පන්දුවට පහරදුන් පෙෂාවර් සල්මි කණ්ඩායමේ පළමු කඩුල්ල ලෙස මොහොමඩ් හාරිස් පළමු පන්දුවාරයේදීම ලකුණු නොලබා දැවී ගියා.
ඉන්පසු පිටියට පැමිණි කුසල් මෙන්ඩිස් නායක බාබර් අසාම් සමග එක්වී මෙතෙක් PSL ඉතිහාසයේ ඕනෑම කඩුල්ලක් සඳහා වූ වැඩිම සබඳතාවය ගොඩනැගුවා. ඒ දෙවන කඩුල්ල සඳහා පන්දු 97ට ලකුණු 191ක්.
කුසල් මෙන්ඩිස් පන්දු 52 දී ලකුණු 109ක් ලබාගත් අතර ඔහුගේ ඉනිමට හයේ පහර 4ක් සහ හතරේ පහර 14ක් ඇතුලත් වුණා. බාබර් අසාම් නොදැවී පන්දු 51ට ලකුණු 87ක් ලබාගත්තා. පෙෂාවර් ඉනිම අවසානයේදී අබ්දුල් සමාද් පන්දු 12ට ලකුණු 40ක් ලබාගත්තා.
ඒ අනුව පෙෂාවර් සල්මි කණ්ඩායම පන්දුවාර 20 අවසනයේදී කඩුලු 3ට ලකුණු 240ක් ලබාගත්තා. ඊට පිලිතුරු වශයෙන් කරච්චි කිංග්ස් කණ්ඩායමට ලබාගැනීමට හැකිවුණේ සියලු දෙනා දැවී ලකුණු 87ක් පමණයි.
පෙෂාවර් කණ්ඩායම වෙනුවෙන් ඉෆ්තිකාර් අහමඩ්, නහීඩ් රානා හා සුෆියාන් මුකීන් කඩුලු 3 බැගින් දවාගැනීමට සමත්වුණා.
ඒ අනුව තරගය ලකුණු 159කින් ජයගැනීමට පෙෂාවර් සල්මි කණ්ඩායම සමත් වූ අතර තරගයේ වීරයා වූයේ කුසල් මෙන්ඩිස්.
