අයි පී එල් ක්‍රිකට් තරගාවලියේ දෙවැනි අවසන් පූර්ව තරගයට සුදුසුකම් ලබා ගැනීමට මුම්බායි ඉන්දියන්ස් කණ්ඩායම සමත්වුණා. ඒ ගුජරාට් ටයිටන්ස් කණ්ඩායම සමග ඊයේ පැවති තරගය ලකුණු 20 කින් ජය ගනිමින්.
අයී පී එල් ක්‍රිකට් තරගාවලියේ මුලික වටය අවසන් වනවිට ලකුණු සටහනේ තෙවන සහ සිව්වන ස්ථානයේ පසුවු මුම්බායි ඉන්දියන්ස් සහ ගුජරාට් ටයිටන්ස් කණ්ඩායම් අතර තරගය පැවැත්වුණේ, මුලන්පූර් හි නිව් චන්ඩිගා ක්‍රීඩාංගණයේදි.
පළමුවෙන් පන්දුවට පහර දුන් මුම්බායි ඉන්දියන්ස් කණ්ඩායම පන්දුවාර 20 ඇතුළත කඩුලු 5 ක් දැවි ලකුණු 228 ක් රැස් කළා.
රෝහිත් ෂර්මා ලකුණු 81 ක් ලබාගත් අතර, ජොනී බෙයිස්ටෝව් ලකුණු 47 යි. පන්දු යැවීමේදි සායි කිෂෝර් සහ ප්‍රසීද් ක්‍රිෂ්ණා අතර කඩුලු 2 බැගින් බෙදී ගියා.
පිළිතුරු ලෙස ගුජරාට් ටයිටන්ස් කණ්ඩායම පන්දුවාර 20 ඇතුළත කඩුලු 6 ක් දැවි ලකුණු 208 ක් රැස් කළා. සායි සුදර්ශන් ලකුණු 80 යි. වොෂිංටන් සුන්දර් ලකුණු 48 ක් ලබාගත්තා.
කුසල් මෙන්ඩිස් ලකුණු 20 කට දැවි ගියා. පන්දු යැවීමේදි මුම්බායි කණ්ඩායම වෙනුවෙන් ට්‍රේන්ට් බෝල්ට් කඩුලු 2 ක් බිදහෙලුවා.
තරගය ජයගත් මුම්බායි ඉන්දියන්ස් කණ්ඩායම තරගාවලියේ දෙවැනි අවසන් පූර්ව තරගයට සුදුසුකම් ලැබු අතර, පරාජයට පත්වු ගුජරාට් ටයිටන්ස් කණ්ඩායමට තරගාවලියෙන් ඉවත් වීමට සිදුවුණා.
මුම්බායි ඉන්දියන්ස් සහ පංජාබ් කින්ග්ස් අතර දෙවැනි අවසන් පූර්ව තරගය හෙට අහමදාබාද් හිදි පැවැත්වීමට නියමිතයි.
ඉන් ජයගන්නා කණ්ඩායම තරගාවලියේ අවසන් තරගයට සුදුසුකම් ලබාගන්නවා. මේ වනවිටත් රෝයල් චැලෙන්ජර්ස් බෙංගලූරු කණ්ඩායම තරගාවලියේ අවසන් තරගයට සුදුසුකම් ලබා තිබෙන අතර අවසන් තරගය ලබන 3 වැනිදා පැවැත්වීමට නියමිතයි.
