2026 විස්සයි විස්ස ලෝක කුසලාන තරගාවලියේ ඊයේ දින පැවති එක්සත් අරාබි එමීර් රාජ්යය හා නවසීලන්තය අතර තරගය ලෝක වාර්තාවක් පිහිටුවමින් කඩුලු 10ක ජයක් ලැබීමට නවසීලන්ත කණ්ඩායම සමත් වුණා. තරගය පැවැත්වුණේ චෙන්නායි හීදී.
පළමුවෙන් පන්දුවට පහරදුන් එමීර් රාජ්ය කණ්ඩායම කඩුලු 6ට ලකුණු 173ක් ලබගත් අතර එම ලකුණු සංඛ්යාව කිසිදු කඩුල්ලක් නොදැවී ආරම්භක කඩුල්ලෙන්ම හඹාගිය නවසීලන්ත කණ්ඩායම පන්දුවාර 15.2දී ලකුණු 175ක් ලබාගත්තා.
ෆින් ඇලන් හා ටිම් සයිෆර්ට් අතර ගොඩනැගුණු මෙම සබදතාවය විස්සයි විස්ස ලෝක කුසලාන තරගාවලියකදී ඕනෑම කඩුල්ලක් සඳහා ගොඩනැගූ හොදම සබඳතාවය ලෙස වාර්තා පොත් අතරට එකතු වුණා.
මීට පෙර එම වාර්තාව හිමිව තිබුණේ එංගලන්තයේ ජොස් බට්ලර් හා ඇලෙක්ස් හේල්ස් අතර ලකුණු 170ක් ලෙසටයි.
මෙම වාර්තාගත ඉනිමේදී ටිම් සයිෆර්ට් පන්දු 42ට නොදැවී ලකුණු 89ක් ලබාගත් අතර ෆින් ඇලන් පන්දු 50ට නොදැවී ලකුණු 84ක් ලබාගත්තා.
එක්සත් අරාබි එමීර් රාජ්යය වෙනුවෙන් එහි නායක මොහොමඩ් වසීම් පන්දු 45ට ලකුණු 66ක් ලබාගත් අතර අලීශාන් ශරෆු ලකුණු 55ක් ලබාගත්තා.
නවසීලන්තය වෙනුවෙන් පන්දු යැවීමේදී මැට් හෙන්රි කඩුලු 2ක් හා ලොකී ෆර්ග්සන්, ජේකබ් ඩෆී, මිචෙල් සැට්න්නර් හා ග්ලේන් ෆිලිප්ස් එක් කඩුල්ල බැගින් දවාගත්තා.
