සංචාරක ශ්රී ලංකා ක්රිකට් කණ්ඩායම සමඟ පැවැත්වෙන තරග දෙකකින් සමන්විත එක්දින ක්රිකට් තරගාවලිය සඳහා ජ්යෙෂ්ඨ පිතිකරුවකු සහ කඩුලු රකින්නකු වන බ්රෙන්ඩන් ටේලර් කැඳවීමට සිම්බාබ්වේ ක්රිකට් තේරීම් කමිටුව කටයුතු කර තිබේ.
ක්රේග් අර්වින්ගේ නායකත්වය යටතේ ක්රීඩකයන් 16 දෙනකුගෙන් සමන්විත සංචිතය සඳහා ටේලර් කැඳවා ඇත්තේ වසර 4කට පසු වීම විශේෂත්වයකි.
ටේලර්ට 2021 වසරේ තරග පාවාදීමක් සඳහා අල්ලස් ලබාගත් බවට ඔප්පුවීමෙන් අයිසීසී දූෂණ මර්දන ඒකකය විසින් පැනවූ වසර තුනහමාරක ජාත්යන්තර ක්රිකට් තහනමක් හේතුවෙන් ඔහුට ක්රීඩා කිරීමට අවස්ථාවක් හිමි නොවීය. අයිසීසීයේ දූෂණ විරෝධී සංග්රහය උල්ලංඝනය කිරීමේ චෝදනා හතරක් සහ තහනම් උත්තේජක චෝදනාවක් හේතුවෙන් ඔහුට මේ තරග තහනම පැනවීමට කටයුතු කර තිබිණි.
මේ සංචිතය සඳහා ටෝනි මුන්යොංගා, ක්ලයිව් මදන්ඩේ සහ බ්රැඩ් එවන්ස් යළි කැඳවා ඇති අතර, තවමත් ජාත්යන්තර තරග වරම් දිනා නැති 32 හැවිරිදි තුන් ඉරියව් ක්රීඩක අර්නස්ට් මසුකු ද සංචිතයට එක්ව සිටියි.
මේ අතර තරගාවලියට එක්වීම සඳහා සිම්බාබ්වේ බලා පිටත්ව ගිය ශ්රී ලංකා කණ්ඩායම ඊයේ හරාරේහිදී පුහුණුවීම්වල නිරත වූහ.
ශ්රී ලංකා – සිම්බාබ්වේ තරග දෙකකින් සමන්විත එක්දින තරගාවලිය මේ මස 29 සහ 31 දෙදින හරාරේහිදී පැවැත්වේ.
සිම්බාබ්වේ එක්දින සංචිතය – ක්රේග් අර්වින් (නායක), බ්රයන් බෙනට්, ජොනතන් කැම්බල්, බෙන් කරන්, බ්රැඩ් එවන්ස්, ට්රෙවර් ග්වාන්ඩු, වෙස්ලි මදේවෙරේ, ක්ලයිව් මැඩන්ඩේ, අර්නස්ට් මසුකු, ටෝනි මුන්යොන්ගා, බ්ලෙසින් මුසරබානි, රිචඩ් න්ගරාවා, නිව්මන් නයම්හුරි, සිකන්දර් රාසා, බ්රෙන්ඩන් ටේලර්, ෂෝන් විලියම්ස්.
