ක්‍රීඩක කොන්ත්‍රාත්තුව උල්ලංඝනයේ කිරීමේ චෝදනා මත දසුන් ශානකට ශ්‍රී ලංකා ක්‍රිකට් ආයතනය විසින් ඇමරිකානු ඩොලර් 10,000ක දඩ මුදලක් නියම කොට ඇත.
දසුන් ශානක Major Club තුන් දින තරගාවලියට සහභාගී වී සිටියදී ආබාධයක් හේතුවෙන් තරගාවලි‍යෙන් ඉවත් විය.
ආබාධය පිලිබඳ වෛද්‍ය සහතික ඉදිරිපත් කළ පසු අනෙක් තරගවලින් ඔහුට විවේක ගැනීමට අවසර දී ඇත.
කෙසේ වෙතත් එදිනම හවස ඩුබායි ගොස් ලීග් තරගාවලියක තරගයකට සහභාගී වී ඇත.
මෙම ක්‍රියාව ක්‍රීඩක කොන්ත්‍රාත්තුවේ වගන්ති කඩකිරීමක් ලෙස සැලකේ.
දසුන් ශානක මේ පිළිබඳව වරද පිළිගෙන ඇති අතර ඒ පිළිබඳව සිය පසුතැවිල්ල ප්‍රකාශ කොට ඇත.
එසේම තම එම ක්‍රියාව වංක චේතනාවකින් සිදුනොකළ බවත් මින් ඉදිරියට එවැනි ක්‍රියා සිදු නොකිරීමට වගබලා ගන්නා බවත් ශ්‍රී ලංකා ක්‍රිකට් ආයතනයට ප්‍රකාශ කොට ඇත.
