කොල්කටා නයිට් රයිඩර්ස් පිල ඉන්දීය රුපියල් කෝටි 18කට (ශ්‍රී ලංකා රු. කෝටි 62) මිලදී ගත් වේග පන්දු යවන මතීෂ පතිරණට හා ඉන්දීය රුපියල් කෝටි 2කට (ශ්‍රී ලංකා රු. කෝටි 7) ලක්නව් සුපර් ජයන්ට්ස් පිල මිලදී ගත් වනිඳු හසරංගට තවත් සතියකින් ආරම්භ වන අයියිපීඑල් තරගාවලියට සහභාගි වීම උදෙසා විරෝධතා නොමැති සහතික නිකුත් නොකිරීමට ශ්‍රී ලංකා ක්‍රිකට් තීරණය කොට ඇත.
ආබාධ තත්ත්වයක් හේතුවෙන් විස්සයි20 ලෝක කුසලාන තරගාවලියෙන් ඉවතට ගිය වනිඳු හසරංගට හා මතීෂ පතිරණට අමතරව වේග පන්දු යවන එෂාන් මාලිංගට ද අයිපීඑල් තරගාවලියට සහභාගි වීම සඳහා අවසරය හිමිව නැත.
මේ ක්‍රීඩකයන් ඔවුන්ගේ අනිවාර්ය කායික යෝග්‍යතා පරීක්ෂණ සාර්ථකව නිම කිරීමට අපොහොසත් වීම හේතුවෙන් මේ තීරණය ගෙන ඇත.
නුවන් තුෂාරගේ සහභාගිත්වය ඔහුගේ පරීක්ෂණ ප්‍රතිඵල මත තීරණය වන අතර, වනිඳු හසරංග, එෂාන් මාලිංග සහ මතීෂ පතිරණ යන ක්‍රීඩකයන් ඉදිරියේදී යෝග්‍යතා පරීක්ෂණයට මුහුණදිය යුතු වේ.
ලබන 28 වැනිදා ඉන්දීය ප්‍රීමියර් ලීග් ක්‍රිකට් තරගාවලිය පැවැත්වෙන අතර, දුෂ්මන්ත චමීර, පැතුම් නිශ්ශංක සහ කමිඳු මෙන්ඩිස් යන ක්‍රීඩකයන් අනිවාර්ය කායික යෝග්‍යතා පරීක්ෂණ සාර්ථකව නිම කිරීම හේතුවෙන් විරෝධතා නොමැති සහතික නිකුත් කිරීමට ශ්‍රී ලංකා ක්‍රිකට් කටයුතු කළේය.
ඒ අනුව වේග පන්දු යවන චමීර සහ ආරම්භක පිතිකරු නිශ්ශංක දිල්ලි කැපිටල්ස් සමඟ එක්වීමට නියමිත අතර, තුන් ඉරියව් ක්‍රීඩක මෙන්ඩිස් සන්රයිසස් හයිද්‍රාබාද් වෙනුවෙන් ක්‍රීඩා කරනු ඇත.
ශ්‍රී ලංකා ක්‍රිකට් ආයතනය මඟින් නිකුත් කරන ලද නිල නිවේදනයකට අනුව, ක්‍රීඩකයන් තිදෙනකුට පමණක් ඉන්දීය ප්‍රිමියර් ලීග් තරගාවලියට සහභාගී වීම උදෙසා අවසරය හිමිව ඇත.
නව ක්‍රිකට් තේරීම් කමිටුව, ක්‍රීඩා අමාත්‍යාංශය සමඟ එක්ව, ක්‍රීඩකයන්ගේ යෝග්‍යතා ඉහළ නැංවීමේ වැඩමුළුවක් පවත්වා‍ගෙන යන අතර, එමඟින් ක්‍රීඩකයන්ගේ ශක්තිය, වේගය සහ විඳදරා ගැනීම වැඩිදියුණු කිරීමේ යෝග්‍යතා අභ්‍යාස ක්‍රියාත්මක වේ. ශ්‍රී ලංකා ක්‍රිකට් ආයතනය සමඟ ගිවිසුම්ගත සියලු ක්‍රීඩකයන් මේ විශේෂිත ශාරීරික පුහුණු වැඩසටහනට සහභාගි විය යුතුව ඇත.
