2026 ලෝක කුසලාන 20-20 ක්රිකට් තරගාවලිය සඳහා බංග්ලාදේශය වෙනුවට ස්කොට්ලන්තය ඇතුළත් කළ බව, ජාත්යන්තර ක්රිකට් කවුන්සිලය නිවේදනය කර තිබෙනවා.
සති තුනකට ආසන්න කාලයක් බංග්ලාදේශය, තරගාවලියට සහභාගී වීම සඳහා ඉන්දියාවට යාම ප්රතික්ෂේප කිරීම හේතුවෙන් ගැටලුකාරී තත්වයක් උද්ගත වී තිබුණා. ලෝක කුසලාන 20-20 ක්රිකට් තරගාවලිය ශ්රී ලංකාවේ සහ ඉන්දියාවේ සත්කාරකත්වයෙන් ලබන මස 7 වැනිදා ආරම්භ කිරීමට නියමිතයි. බංග්ලාදේශය ඇතුළත්ව තිබූ ‘සී’ කාණ්ඩයේ තරග, ඉන්දියාවේ පැවැත්වීමටයි, සැලසුම් කර තිබුණේ.
එහෙත්, ආරක්ෂක හේතූන් මත තරගාවලිය සඳහා ඉන්දියාවට යෑමට නොහැකි බව පවසමින් බංග්ලාදේශ ක්රිකට් ආයතනය ඉල්ලීමක් කර තිබුණේ, තම රට සහභාගී වන තරග ශ්රී ලංකාවේ පවත්වන ලෙසටයි. කෙසේ වුවද ක්රීඩකයින්ට, මාධ්යවේදීන්ට හෝ බංග්ලාදේශ ප්රේක්ෂකයින්ට කිසිදු ආරක්ෂක ගැටලුවක් නොමැති බව තහවුරු කරමින් ජාත්යන්තර ක්රිකට් කවුන්සිලය තරග කාල සටහන වෙනස් නොකරන බවට සඳහන් කර තිබුණා. ඒ සම්බන්ධයෙන් සාකච්ඡා කිරීම සඳහා ජාත්යන්තර ක්රිකට් කවුන්සිලයේ නියෝජිතයෙකු බංග්ලාදේශය වෙත පිටත්ව ගිය ද ගැටලුව නිරාකරණය වූයේ නැහැ.
අවසානයේ ජාත්යන්තර ක්රිකට් කවුන්සිලය අද නිවේදනය කළේ, බංග්ලාදේශය තරගාවලියට සහභාගී වීම ප්රතික්ෂේප කිරීම හේතුවෙන් ඒ වෙනුවට ස්කොට්ලන්තය තරගාවලියට ඇතුළත් කළ බවයි. ඒ අනුව, ‘සී’ කාණ්ඩයට ස්කොට්ලන්තය, එංගලන්තය, ඉතාලිය, නේපාලය සහ බටහිර ඉන්දීය කොදෙව් යන කණ්ඩායම් ඇතුළත් වනවා.
