ශ්‍රී ලංකා – ඉන්දියා දෙවැනි ටෙස්ට් ක්‍රිකට් තරගය, ජය පරාජයෙන් තොරව අද අවසන් වුණා. ඒ අනුව, ඉන්දියාව තරගාවලිය ජය ගත්තේ, 1 ට බින්දුවක් ලෙසින්.
තරගය පැවැත්වුණේ, කොළඹ එස්.එස්.සී. ක්‍රීඩාංගණයේදී. පස්වැනි දිනට අද තරගය ආරම්භ කරන විට ශ්‍රී ලංකාව තම දෙවැනි ඉනිමට කඩුලු 6 ක් දැවී ලකුණු 229 ක් ලබා සිටියා. නොදැවී පන්දුවට පහර දෙමින් සිටියේ සොනාල් දිනූෂ සහ කේෂර නුවන්ත. කේෂර නුවන්ත ලකුණු 46 යි. සොනාල් දිනූෂ තම ටෙස්ට් ක්‍රිකට් දිවියේ 3 වැනි ශතකය වාර්තා කිරීමට අද සමත් වුණා. ඔහු මෙම ටෙස්ට් තරගයේ ඉනිම් දෙකේදීම ශතක රැස් කරමින්, එම දක්ෂතාව දැක් වූ 8 වැනි ශ්‍රී ලාංකික ක්‍රිකට් ක්‍රීඩකයා ලෙස වාර්තා අතරට එක් වුණා.
2001 වසරේදී බ්‍රයන් ලාරාගෙන් පසුව එස් එස් සී ක්‍රීඩාංගණයේදී ටෙස්ට් තරගයක ඉනිම් දෙකේදීම ශතක රැස් කළ පළමු ක්‍රීඩකයා වන්නේ ද සොනාල් දිනූෂයි. ඔහු, අද රැස් කළ ශතකයක් සමගින් මෙම තරගාවලියේදී ශතක තුනක් ලබා ගැනීමට සමත් වීම විශේෂත්වයක්.
එය වාර්තා අතරට එක් වුණේ, තරග දෙකක ටෙස්ට් තරගාවලියකදී ශතක තුනක් රැස් කළ තෙවැනි ශ්‍රී ලාංකික ක්‍රිකට් ක්‍රීඩකයා ලෙසින්. මින් පෙර අරවින්ද ද සිල්වා අවස්ථා දෙකකදී සහ කුමාර සංගක්කාර එක් අවස්ථාවකදී මෙම දක්ෂතාව දක්වා තිබෙනවා.
තරගයේ පළමු ඉනිමට ඉන්දියාව කඩුලු 9 ක් දැවී ලකුණු 503 ක් රැස් කළා. ශ්‍රී ලංකාව තම පළමු ඉනිමට සියලු ක්‍රීඩකයින් දැවී රැස්කළ ලකුණු සංඛ්‍යාව 290 ක්. පළමු ඉනිමේදී ඉන්දියාවට වඩා ලකුණු 213 පසුපසින් සිටිමින් ශ්‍රී ලංකාව තම දෙවැනි ඉනිම ආරම්භ කළා. තරගය නිමා වන විට ශ්‍රී ලංකා කණ්ඩායම දෙවැනි ඉනිමට කඩුලු 9 ක් දැවී ලකුණු 429 ක් ලබා සිටියා. තරගයේ වීරයා සොනාල් දිනූෂ. තරගාවලියේ වීරයා සම්මානය දෙව්දත් පඩික්කාල්ට හිමි වුණා.
