14 වැනි ආසියානු කුසලාන දැල්පන්දු තරගාවලියේ මූලික වටයේ මාලදිවයින් කණ්ඩායම සමඟ ඊයේ පැවති තරගයෙන් ශ්‍රී ලංකා කණ්ඩායම ජය හිමි කර ගත්තා.
දැල්පන්දු තරගාවලිය ලබන 15 වැනි දින දක්වා හොංකොං හිදී පැවැත්වෙනවා.
කණ්ඩායම් 11 කගේ සහභාගීත්වයෙන්, ශූරතා සහ පළඟ කුසලාන වෙනුවෙන් තරගාවලිය, සංවිධාන කර තිබෙනවා.
ශ්‍රී ලංකා කණ්ඩායම එහි ශූරතා කුසලානයට තරග වදින අතර, එහි මූලික වටයේ ශ්‍රී ලංකාව තරග කළ පස්වැනි තරගය ලෙසයි, මාලදිවයින් සහ ශ්‍රී ලංකා කණ්ඩායම් අතර තරගය පැවැත්වුණේ.
එම තරගය ලකුණු 78 ට 33 ක් ලෙස ජය ගැනීමට ශ්‍රී ලංකා කණ්ඩායම සමත් වුණා.
තරගාවලියේ මූලික වටයේදී ශ්‍රී ලංකා කණ්ඩායම තරග 5 ක් ක්‍රීඩා කළා.
එහිදී, ශ්‍රී ලංකාව මුහුණ දුන් පළමු තරගය හොංකොං කණ්ඩායම සමග පැවති අතර, එය ලකුණු 57 ට 57 ක් ලෙස නිමාවුණේ ජය පරාජයෙන් තොරවයි.
දෙවැනි තරගය, ප්‍රතිවාදී සිංගප්පූරු කණ්ඩායම හමුවේ ලකුණු 62 ට 51 ක් ලෙස පරාජය වුණා.
ශ්‍රී ලංකා ක්‍රීඩිකාවන් තෙවැනි තරගය ලෙස මැලේසියා කණ්ඩායම සමග තරග වැදුණු අතර, එහිදී ලකුණු 66 ට 52 ක් ලෙසින් ජය හිමි කර ගැනීමට සමත් වුණා.
සිව් වැනි තරගය ඉන්දියාව සහ ශ්‍රී ලංකා කණ්ඩායම් අතර පැවති අතර, එම තරගය ලකුණු 100 ට 34 ක් ලෙස ජය ගැනීමට ශ්‍රී ලංකා කණ්ඩායම සමත් වුණා.
14 වැනි ආසියානු කුසලාන දැල්පන්දු තරගාවලියේ මූලික වටයේ තරග ඊයේ දින අවසන් වූ අතර අවසන් පූර්ව තරග හෙට පැවැත්වෙනවා. ශූරතා කුසලානය වෙනුවෙන් ශ්‍රී ලංකාව, සිංගප්පූරු කණ්ඩායම සමගින් හෙට පළමු අවසන් පූර්ව තරගයට ක්‍රීඩා කිරීමට නියමිතයි.
එහි දෙවැනි අවසන් පූර්ව තරගය මැලේසියාව සහ හොංකොං කණ්ඩායම් අතර පැවැත්වෙනවා.
තරගාවලියේ අවසන් මහා තරග ලබන 15 වැනිදා පැවැත්වීමට නියමිතයි.
ශ්‍රී ලංකා කණ්ඩායම 2024 ආසියානු කුසලාන දැල්පන්දු තරගාවලියේ අනුශූරතාව හිමි කර ගත් අතර, 2022 වසරේ ශූරතාව හිමි කර ගැනීමට සමත් වුණා.
