3 වන ආසියානු යොවුන් ක්‍රීඩා උළෙලට සහභාගී වන ශ්‍රී ලංකා ක්‍රීඩක ක්‍රීඩකාවන් පිළිබඳව දැනුවත් කිරීමේ මාධ්‍ය හමුව ඊයෙ (11) ක්‍රීඩා අමාත්‍යාංශයේ ඩන්කන් වයිට් ශ්‍රවණාගාරයේ දී පැවැත්වුණා.
ආසියානු යොවුන් ක්‍රීඩා උළෙල ඔක්තෝබර් 22 දා සිට 31 වන දා දක්වා බහරේන් වල මනමාහිදී පැවැත්වෙනවා.
ශ්‍රී ලංකාව නියෝජනය කරමින් යොවුන් ක්‍රීඩක ක්‍රීඩකාවන් 100 දෙනකු සහභාගි වන අතර, ක්‍රීඩකයින් 56 දෙනෙකු සහ ක්‍රීඩිකාවන් 44 දෙනෙකු ඊට ඇතුලත්.
ඒ ක්‍රීඩා ඉසව් 12 ක් නියෝජනය කිරීම සඳහායි.
ඒ මළල ක්‍රීඩා, බැට්මින්ටන්, පැසිපන්දු, බොක්සින්, ඊස්පෝර්ට්ස්, ගොල්ෆ්, කබඩි, පිහිනුම්, ටයිකොන්ඩෝ, බීච් වොලිබෝල්, බර ඉසිලීම හා මල්ලව පොර යන ක්‍රීඩායි.
ක්‍රීඩක ක්‍රීඩිකාවන්ට අමතරව නිලධාරීන් සහ පුහුණුකරුවන් 54 දෙනකු මේ සඳහා සහභාගි වීමට නියමිතයි.
ශ්‍රී ලංකා කණ්ඩායමේ ප්‍රධාන නිලධාරියා ලෙස (Chef-de-Mission – CDM) විශ්‍රාමික රියල් අද්මිරාල් මංජුල දිසානායක මහතා සහභාගී වන අතර නියෝජ්‍ය ප්‍රධාන නිලධාරියා ලෙස (Deputy Chef-de-Mission – DCDM) ගෘෘප් කපිතාන් නලින් වැවකුඹුර මහතා ඊට සහභාගී වනවා.
ක්‍රීඩා උළෙලේ සමාරම්භක උත්සවයේදී ශ්‍රී ලංකා ධජය රැගෙන යනු ලබන්නේ යොවුන් බොක්සින් ක්‍රීඩක ජනිදු ධනංජය හා යොවුන් මළල ක්‍රිඩිකා දිලිනි නෙත්සලායි.
මෙම මාධ්‍ය හමුවේදී අදහස් දැක්වූ ශ්‍රී ලංකා ඔලිම්පික් කමිටුවේ සභාපති සුරේෂ් සුභ්‍රමණියම් මහතා පැවසුවේ, මෙය යොවුන් ක්‍රීඩක ක්‍රීඩිකාවන්ට ස්වර්ණමය අවස්ථාවක් බවත්, ඉන් ප්‍රයෝජන ගෙන ජාත්‍යන්තර තලයේ ඉදිරියට යාමට හැකියාව ඇති කරගත යුතු බවත්ය.
ක්‍රීඩා අමාත්‍යංශය විසින් ප්‍රවාහන, ආහාර හා නවාතැන් ඇතුළු සියලු වියදම් දරමින් මෙවැනි ජාත්‍යන්තර අත්දැකීම් ක්‍රීඩක ක්‍රීඩිකාවන් හට ලබා දෙන්නේ අනාගත ජයග්‍රහණ උදෙසා බව ඔහු වැඩිදුරටත් පවසා සිටියා.
ශ්‍රී ලංකා යොවුන් ක්‍රීඩක ක්‍රීඩිකාවන්ගේ නිල ඇඳුම් කට්ටල නිල වශයෙන් ප්‍රධානය කිරීමද මෙහිදී සිදු කෙරුණා.
ක්‍රීඩක ක්‍රීඩිකාවන්ගේ නිල ඇඳුම් සහකරු ලෙස Carnage අත්වැල් බැඳ ගෙන සිටින අතර ඒවා නිල වශයෙන් භාරදීම Carnage හී නිර්මාතෘ හා අධ්‍යක්ෂක ජොඑල් තිල්ලේකරත්න මහතා අතින් සිදු කෙරුණා.
ඊට අමතරව ශ්‍රී ලංකා ක්‍රීඩක ක්‍රීඩිකාවන්ගේ සමාරම්භක උළෙලේ නිල ඇඳුම් සහකරු ලෙස ඉදිරිපත් වී සිටියේ LOVI Ceylon ආයතනයයි.
ඒවා නිල වශයෙන් භාරදීම සිදුකරුණේ LOVI Ceylon හී නිර්මාතෘ අසංක ද මෙල් මහතාගේ සුරතින්.
2009 වසරේ සිංගප්පූරුවේ පැවති පළමු ආසියානු යොවුන් ක්‍රීඩා උළෙලේදී ශ්‍රී ලංකාව රිදී පදක්කමක් සහ ලෝකඩ පදක්කම් දෙකක් හිමි කර ගත් අතර 2013 වසරේ නැන්ජින් හි පැවති දෙවන ආසියානු යොවුන් ක්‍රීඩා උළෙලේදී ශ්‍රී ලංකාව හිමි කරගත් පදක්කම් සංඛ්‍යාව හයක්.
ඊට රිදී පදක්කමක් සහ ලෝකඩ පදක්කම් පහක් ඇතුළත්.
