තරුණ කටයුතු සහ ක්‍රීඩා අමාත්‍යාංශය සංවිධානය කරන Lanka Ride පාපැදි සවාරිය අද (16දා) උදෑසන 9ට ලේක්හවුස් ආයතන ඉදිරිපිට දී ආරම්භ විය.
එහි සමාරම්භක අවස්ථාවට මහමාර්ග ප්‍රවාහන හා නාගරික සංවර්ධන අමාත්‍ය බිමල් රත්නායක මහතා, තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ මහතා, ක්‍රීඩා නියෝජ්‍ය අමාත්‍ය සුගත් තිලකරත්න මහතා, තරුණ කටයුතු සහ ක්‍රීඩා අමාත්‍යාංශ ලේකම් අරුණ බණ්ඩාර මහතා, ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජෙනරාල් එස්. අච්චුදන් මහතා ඇතුළු තරුණ කටයුතු සහ ක්‍රීඩා අමාත්‍යාංශයේ නිලධාරීන් හා ලේක්හවුස් ආයතනයේ සභාපති ගාමිණි වරුෂමාන මහතා, ලේක්හවුස් ආයතනයේ කර්තෘ මණ්ඩල අධ්‍යක්ෂ සිසිර යාපා මහතා ඇතුළු නිලධාරීන් සහභාගී වූහ. එමෙන්ම යුධ හමුදා, ගුවන් හමුදා සහ පොලිස් ප්‍රධානීන් මෙම අවස්ථාවට සහභාගී වී සිටියහ.
Lanka Ride පාපැදි සවාරිය පළමු දිනය නුවරට ගමන් කළ අතර, එහි දෙවන දිනය වන හෙට දිනය නුවරින් ආරම්භ වී අනුරාධපුරයට ගමන් කිරීමට නියමිතය. එය 18 වැනිදා අනුරාධපුරයෙන් කොළඹ බලා පැමිණේ.
මෙම පාපෙදි සවාරිය සඳහා කණ්ඩායම් 27ක පාපෙදි ක්‍රීඩකයින් සම්බන්ධ වී සිටියි. ඔවුන් ලියපදිංචි කිරීමෙන් අනතුරුව පාපැදි තරගය ආරම්භ කෙරුණි.
නුවරදී අද (16දා) අවසන් කෙරුණු තරඟයේ පළමු අදියරයේ දී ත්‍යාග 5ක් ලබාදුන් අතර, ඒ අනුව අංක 193න් තරඟ කළ එච්.ඩබ්ලිව්.එම්.එස් පින්තු ප්‍රථම ස්ථානය දිනාගත්තේ පැය 2යි විනාඩි 52යි තප්පර 41කින් තරඟය නිමා කරමිනි. අංක 195න් තරඟ කළ ඒ.ඩී.එස් පෙරේරාට දෙවන ස්ථානය හිමි වූ අතර, ඔවුන් දෙදෙනාම ශ්‍රී ලංකා යුධ හමුදා කණ්ඩායම නියෝජනය කරයි. තෙවන ස්ථානය අංක 82න් තරඟයට පිවිසි ජාඇල ෆ්ලෑෂ් කණ්ඩායමේ දේශාන් කවින්ද හිමි කරගත්තේය. අංක 142න් තරඟ කළ සුරංග රණවීර සිව් වන ස්ථානය සහ අංක 33න් තරඟ කළ සිතුම් පූර්ණ පස්වන ස්ථානය දිනාගත්තේය.
හෙට උදෑසන 9ට තරඟය ගන්නෝරුව කෘෂි පර්‍යේෂණ මධ්‍යස්ථානය ඉදිරිපිටින් ආරම්භ වේ.
