2026 20/20 ලෝක කුසලානයේ පළමු අවසන් පූර්ව තරගය කඩුලු 9කින් ජයගත් නවසීලන්තය අවසන් මහා තරගයට සුදුසුකම් ලැබුවා.
නවසීලන්තයේ ආරාධනයෙන් පලමුවෙන් පන්දුවට පහරදුන් දකුණු අප්රිකාව පන්දුවාර 20 අවසානයේ කඩුලු 8ක් දැවී ලබාගත්තේ ලකුණු 169ක් පමණයි. ප්රවේගකාරී පිතිකරනයක නියැළුණු නවසීලන්ත ආරම්භක පිතිකරුවන් පන්දුවාර 12යි පන්දු 5කදී එක් කඩුල්ලක් පමණක් දැවී තරගයේ ජයග්රහණය ලබාගත්තා.
දකුණු අප්රිකාව වෙනුවෙන් මෙවර ලෝක කුසලානය පුරාවටම ලකුණු අතර සිටි මුල් පෙල පිතිකරුවන් හට සාර්ථකවීමට ඉඩනොදුන් නවසීලන්ත පන්දු යවන්නන් පවර් ප්ලේ පන්දුවාර වලදී ලකුණු 48ට කඩුලු 2ක් දවාගැනීමට සමත් වුණා.
මාකෝ ජැන්සන් නොදැවී ලකුණු 55ක් ලබාගත් අතර ඩෙවාල්ඩ් බ්රෙවිස් ලකුණු 34කට දැවී ගියා. තරගාවලිය පුරාවටම සාර්ථක වූ නායක ඒඩ්න් මාක්රම් හට ලබාගැනීමට හැකිවුණේ ලකුණු 18ක් පමණයි.
පන්දු යැවීමේදී නවසීලන්තය වෙනුවෙන් මැට් හෙන්රි, කෝල් මැක්කොන්කි හා රචින් රවීන්ද්ර කඩුලු 2 බැගින් දවාගත් අතර ලොකී ෆර්ගසන් හා ජිමී නීෂම් එක් කඩුල්ල බැගින් දවාගත්තා.
පිලිතුරු ඉනිම සඳහා පිටියට පිවිසි ටිම් සයිෆර්ට් හා ෆින් ඇලන් පවර් ප්ලේ පන්දුවාර 6ට කිසිවෙකු නොදැවී ලකුණු 84ක් ලබාගත් අතර පළමු කඩුල්ල වෙනුවෙන් ලකුණු 117ක සබඳතාවයක් ගොඩනැගුවා.
10වන පන්දුවාරයේදී පලමු කඩුල්ල ලෙස ටිම් සයිෆර්ට් ලකුණු 55ට දැවී ගිය අතර වීසයි විස්ස ලෝක කුසලානයක වේගවත්ම ශතකය වාර්තා කරමින් ෆින් ඇලන් පන්දු 33ට නොදැවී ලකුණු 100ක් ලබාගත්තා.
මෙම කඩුලු 9ක ජයග්රහණයත් සමග නවසීලන්ත කණ්ඩායම මෙවර ලෝක කුසලානයේ අවසන් මහා තරගයට සුදුසුකම් ලැබුවා.
