ඇමරිකානු තානාපතිනි ජූලි චංග් සහ තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ අතර හමුවක් අද (18) තරුණ කටයුතු සහ ක්‍රීඩා අමාත්‍යංශයේ දී පැවත් විය. මෙම හමුව සඳහා තරුණ කටයුතු නියෝජ්‍ය අමාත්‍ය එරංග ගුණසේකර ද සහභාගී විය.
දෙරට අතර ක්‍රීඩා සහයෝගීතාව වර්ධනය කරගැනීම පිළිබඳව මෙහිදී සාකච්ඡා කළ අතර, විශේෂයෙන් ක්‍රීඩා හා බැඳුණු සංචාරක කර්මාන්තයේ වර්ධනයට කළ හැකි මැදිහත් වීම පිළිබඳව මෙහි දී අවධානය යොමු විය.
ශ්‍රී ලංකාවේ පිහිටා ඇති ඇමරිකානු මාධ්‍යස්ථාන හරහා මෙරට තරුණ තරුණියන්ට ඉංග්‍රීසි සහ වෘත්තීය පුහුණුව ආදිය ලබා දීමට අවශ්‍ය කඳවුරු පැවැත්වීම සඳහා අවශ්‍ය සහය දැක්විය හැකි ආකාරය පිළිබඳවත් මෙහිදී සාකච්ඡා කරන ලදී.
වත්මන් රජය මෙරට ක්‍රීඩාවේ දියුණුවට සහ තරුණ කටයුතු වර්ධනය වෙනුවෙන් කරන මැදිහත් වීම අගය කළ තානාපතිවරිය, රටක් ලෙස ඒ සඳහා තවදුරටත් තම සහයෝගය දක්වන බවත්, මානසික සෞඛ්‍ය සහ වෘත්තීය පුහුණුව ප්‍රවර්ධනය කිරීම පිළිබඳව මෙවර අයවැයේ දී අවදානය යොමු කිරීම පිළිබඳව තමන් සතුටට පත් වන බවත් වැඩිදුරටත් පැවසුවාය.
