සංචාරක ශ්‍රී ලංකා කණ්ඩායම හා පාකිස්තානය අතර තරග තුනකින් සමන්විත එක්දින තරගාවලියේ අවසන් තරගය කඩුලු 6කින් ජයගත් පාකිස්තානු කණ්ඩායම එක්දින තරගාවලිය තරග 3-0ක් ලෙස ජයග්‍රහණය කළා.
මුලින් පන්දුවට පහරදුන් ශ්‍රී ලංකා කණ්ඩායමේ සියලු කඩුලු ලකුණු 211ට දැවී ගියා. ශ්‍රී ලංකාව වෙනුවෙන් සදීර සමරවික්‍රම ලකුණු 48ක් ලබාගත් අතර කුසල් මෙන්ඩිස් ලකුණු 34ක් ද, සිය පලමු එක්දින තරගයට ක්‍රීඩා කළ පවන් රත්නායක ලකුණු 32ක් ද ලබාගත්තා.
මේ තරගාවලිය පුරාම දැක්වූ ශ්‍රී ලංකා පිතිකරුවන්ගේ දිගු ඉනිම් ක්‍රීඩා කිරීමේ නොහැකියාව මෙම තරගයේදීත් පෙන්නුම් කළා.
පාකිස්තානය වෙනුවෙන් මොහොමඩ් වසීම් කඩුලු 3ක් හා හාරිස් රාවුෆ් හා ෆය්සාල් අක්‍රම් කඩුලු 2 බැගින් දවාගත්තා.
පිලිතුරු ඉනිම ක්‍රීඩා කළ පාකිස්තානු පිතිකරුවන් 45වන පන්දුවාරයේදී ලකුණු 215ක් ලබමින් තරගය ජයගත්තේ කඩුලු 6ක් ඉතිරිව තිබියදීයි.
මොහොමඩ් රිස්වාන් නොදැවී ලකුනු 61ක් ලබාගත් අතර ෆකාර් සමාන් ලකුණු 55ක් ලබාගත්තා.
පන්දු යැවීමේදී ශ්‍රී ලංකාව වෙනුවෙන් ජෙෆ්‍රි වැන්ඩර්සේ කඩුලු 3ක් දවාගත්තා.
ඒ අනුව මෙම එක්දින තරගාවලිය තරග 3-0ක් ලෙස පාකිස්තානය ජයගත්තා.
තරගයේ වීරයා ලෙස මොහොමඩ් වසීම් නම් කෙරුණු අතර තරගාවලියේ වීරයා වූයේ හාරිස් රාවුෆ්.
ශ්‍රී ලංකා කණ්ඩායමේ පාකිස්තානු සංචාරයේ මීළඟ අදියර තුන්කොන් විස්සයි 20 තරගාවලිය වන අතර එය 18වනදා ආරම්භවීමට නියමිතයි.
