2026 වසරේ ඉන්දීය ප්‍රිමියර් ලීග් තරගාවලිය ඇතුලු ජාත්‍යන්තර ප්‍රිමියර් ලීග් තරගවලට සහභාගි වීමට හැකිවන පරිදි තමන් වෙත “විරෝධතා නොමැති බව” සඳහන් සහතිකය නිකුත් කරන ලෙස ශ්‍රී ලංකා ක්‍රිකට් ආයතනය වෙත බලකිරීමේ අනිවාර්ය අතුරු නියෝගයක් නිකුත් කරන ලෙස ඉල්ලා ක්‍රිකට් ක්‍රීඩක නුවන් තුෂාර මහතා විසින් ගොනු කළ පැමිණිල්ල අද කොළඹ දිසා අධිකරණය වෙතින් ඉල්ලා අස්කර ගත්තා.
මෙම පැමිණිල්ල අද කැඳවූ අවස්ථාවේදී පැමිණිලිකරු වෙනුවෙන් පෙනී සිටි ජ්‍යෙෂ්ඨ උපදේශන නීතිඥ ජී.ජී. අරූල්ප්‍රගාසම් මහතා අධිකරණය හමුවේ කරුණු දක්වමින් ඉන්දියාවේ පැවැත්වෙන අයි.පී.එල් ක්‍රිකට් තරගාවලියට සිය සේවා දායකයාට සහභාගි වීමට අවශ්‍ය කරන විරෝධතාවක් නොමැති බව දැක්වෙන සහතිකය නිකුත් කිරීම ශ්‍රී ලංකා ක්‍රිකට් ආයතනය විසින් ප්‍රතික්ෂේප කිරීම නිසා මෙම නඩුව පැවරීමට සිදුවූ බව සඳහන් කළා.
එහෙත් අයි.පී.එල් ක්‍රිකට් තරඟාවලියේ තරග කිහිපයක් දැනටමත් අවසන් වී ඇති නිසා මෙම පැමිණිල්ල තවදුරටත් පවත්වාගෙන යාම නිශ්ඵල ක්‍රියාවක් බැවින් මෙම පැමිණිල්ල ඉල්ලා අස්කර ගැනීමට සිය සේවා දායකයා අදහස් කරන බව කී නීතිඥවරයා ඊට අවසර දෙන ලෙසත් ඉල්ලා සිටියා.
එම අවස්ථාවේදී විත්තිකාර ක්‍රිකට් ආයතනයේ නිලධාරීන් වෙනුවෙන් පෙනී සිටි ජනාධිපති නීතිඥ චන්දක ජයසුන්දර මහතා අධිකරණය හමුවේ කරුණු දක්වමින් මෙම පැමිණිලිකරු ශාරීරික යෝග්‍යතා පරීක්‍ෂණයෙන් දෙවතාවක් අසමත් වී තිබෙන බව පැවසුවා.
මෙම නඩුකරය ගොනු කිරීමෙන් පසුවද ශාරීරික යෝග්‍යතා පරීක්ෂණයක් පැවති බවත් එම පරීක්ෂණයෙන්ද පැමිලිකරු අසමත් වී ඇති බවත් ජනාධිපති නීතිඥවරයා සඳහන් කළා.
ශාරීරික යෝග්‍යතා පරීක්ෂණය අසමත් වන ක්‍රීඩකයින්ට “විරෝධතාවක් නොමැති බව දැක්වෙන සහතිකය” නිකුත් නොකිරීමේ ශ්‍රී ලංකා ක්‍රිකට් ආයතනයේ ප්‍රතිපත්තිය යටතේ පැමිණිලිකාර ක්‍රිකට් ක්‍රීඩකයාට අදාළ සහතිකය නිකුත් කිරීම ප්‍රතික්ෂේප කළ බවත් ජනාධිපති නීතීඥ චන්දක ජයසුන්දර පෙන්වා දුන්නා.
ඊට ප්‍රතිචාර දක්වමින් පැමිණිලිකාර පාර්ශවයේ නීතිඥ අරුල්ප්‍රගාසම් මහතා මහතා කියා සිටියේ 2024 සහ 2025 යන වසර වල පැවති අයි.පී.එල් ක්‍රිකට් තරගාවලියට තම සේවා දායකයා සහභාගි වූ බවත් එම අවස්ථාවේදී ඔහු ශාරීරික යෝග්‍යතා පරීක්ෂණය අසමත් වී තිබියදී ශ්‍රී ලංකා ක්‍රිකට් ආයතනය අදාළ සහතිකය නිකුත් කිරීමට පියවර ගත් බවත් පෙන්වා දුන්නා.
කෙසේ වෙතත් පැමිණිකාර පාර්ශවයේ ඉල්ලීම පරිදි අදාල පැමිණිල්ල ඉල්ලා අස්කර ගැනීමට අවසර දුන් විනිසුරුවරයා අනතුරුව එය නිෂ්ප්‍රභ කිරීමටද තීන්දු කළා.
