20/20 ලෝක කුසලාන තරගාවලියේ දෙවන තරගය බටහිර ඉන්දීය කොදෙව් කණ්ඩායම හා ස්කොට්ලන්තය අතර කල්කටා ඊඩ්න් ගාඩ්න් පිටියේදී පැවැත්වුණා. විශේෂ දක්ෂතා දැක්වූ කොදෙව් කණ්ඩායම එම තරගය ලකුණු 35කින් ජයගත්තා.
මුලින්ම පන්දුවට පහරදුන් කොදෙව් කණ්ඩායම පන්දුවාර 20 අවසානයේ කඩුලු 5ට ලකුණු 182ක් ලබාගත්තා.
ෂිම්රොන් හෙට්මයර් 20/20 ලෝක කුසලාන තරගයකදී කොදෙව් ක්‍රීඩකයෙක් රැස් කළ වේගවත්ම අර්ධ ශතකය වාර්තා කරමින් පන්දු 36ට ලකුණු 64ක් ලබාගත්තා. ඊට අමතරව බ්‍රැන්ඩන් කිං ලකුණු 35ක්, ෂර්ෆේන් රදෆර්ඩ් ලකුණු 26ක් හා රොෆ්මන් පවෙල් ලකුණු 24ක් ලබාගත්තා.
ස්කොට්ලන්තය වෙනුවෙන් බ්‍රැඩ් කරී කඩුලු 2ක් ලබාගත්තා.
පිලිතුරු ඉනිම ක්‍රීඩා කළ ස්කොට්ලන්ත කණ්ඩායමේ සියලු කඩුලු ලකුණු 147ට දවාගැනීමට කොදෙව් පන්දු යවන්නන් සමත් වුණා.
විශිෂ්ට පන්දු යැවීමක නිරත වූ රොමාරියෝ ෂෙෆර්ඩ් කඩුලු ත්‍රිත්වයක් ද සමගින් ලකුණු 20ට කඩුලු 5ක් දවාගත්තා. ජේසන් හෝල්ඩර් කඩුලු 3යි.
ස්කොට්ලන්තය වෙනුවෙන් නායක රිචී බෙරිංටන් ලකුණු 42ක් හා ටොම් බෲස් ලකුණු 35ක් ලබාගත්තා.
ඒ අනුව මෙවර ලෝක කුසලානයේ ඔවුන් මුහුණ දුන් පලමු තරගයම ලකුණු 35කින් බටහිර ඉන්දීය කොදෙව් කණ්ඩායම ජයග්‍රහණය කළා.
තරගයේ වීරයා ලෙස නම් කෙරුණේ ශිම්‍රන් හෙට්මයර්.
