ශ්‍රී ලංකාවේ යොවුන් මේස පන්දු ක්‍රීඩක ටාවි සමරවීර, ඉතාලියේදී ලැබූ රන් පදක්කම් ජයග්‍රහණයෙන් අනතුරුව, ස්ලෝවැකියාවේ සෙනෙක් (Senec) නගරයේ පැවති WTT Youth Contender Slovakia 2026 තරගාවලියේ වයස අවුරුදු 11න් පහළ බාලක ඒකල ඉසව්වේ රන් පදක්කම දිනා ගැනීමට සමත් විය.
මෙම ජයග්‍රහණය කරා යන ගමනේදී ටාවි විශිෂ්ට දක්ෂතා ප්‍රදර්ශනය කළේය. අර්ධ අවසන් පූර්ව වටයේදී යුක්රේනයේ අංක 1 ක්‍රීඩකයා 3–1ක් ලෙසද, අවසන් පූර්ව වටයේදී මෝල්ඩෝවා ක්‍රීඩකයෙකු 3–0ක් ලෙසද පරාජය කළ ඔහු, අවසන් මහා තරගයේදී ස්ලෝවැකියාවේ අංක 1 ක්‍රීඩකයා 3–1ක් ලෙස පරාජය කරමින් රන් පදක්කම හිමිකර ගත්තේය.
මෙය ටාවි ලෝක මේස පන්දු යෞවන තරගාවලිවලදී වයස අවුරුදු 11න් පහළ ඉසව්වෙන් දිනාගත් 7 වැනි රන් පදක්කම වීම විශේෂත්වයකි.
තවත් සුවිශේෂී වාර්තාවක් ලෙස, පසුගිය වසරේ සිට මේ දක්වා පැවති ලෝක මේස පන්දු යෞවන තරගාවලිවල වයස අවුරුදු 11න් පහළ බාලක ඒකල ඉසව්වේ අවසන් මහා තරග 15කට සුදුසුකම් ලබා ගැනීමට ද ටාවි සමරවීර සමත්ව සිටියි.
මෙය ජාත්‍යන්තර මට්ටමේ ඔහුගේ දක්ෂතාව, අඛණ්ඩ සාර්ථකත්වය සහ ඉහළ තරගකාරීත්වය මැනවින් පෙන්නුම් කරන සුවිශේෂී වාර්තාවකි.
එමෙන්ම වයස අවුරුදු 13න් පහළ ඉසව්වේදී ද දක්ෂතා දැක්වූ ටාවි, එම ඉසව්වේ අවසන් ක්‍රීඩකයන් 16 දෙනා අතරට (Top 16) පිවිසීමට සමත් විය.
2026 වසරේදී වයස අවුරුදු 11න් පහළ ලෝක ශ්‍රේණිගත කිරීමේ ලෝක අංක 1 ස්ථානයටද පත්වූ ටාවි, වසර දෙකකට ආසන්න කාලයක් ලොව හොඳම ක්‍රීඩකයන් සිව්දෙනා අතර තම ස්ථානය රැක ගැනීමට සමත්ව සිටීම ඔහුගේ සුවිශේෂී දක්ෂතාව හා ස්ථාවරත්වය මැනවින් පෙන්නුම් කරයි.
ජාත්‍යන්තර වේදිකාවේ ශ්‍රී ලංකා ධජය ඔසවමින් ටාවි ලබාගන්නා මෙම ජයග්‍රහණය ශ්‍රී ලංකාවට තවත් අභිමානවත් අවස්ථාවකි.
තවත් රන් පදක්කමක්. ශ්‍රී ලංකාවට තවත් අභිමානයක්!
