වසර 13 ක දිගු විරාමයකින් පසු, එනම් 2013 වසරෙන් පසු පළමු වරට සංවිධානය කෙරුණු ‘පීටරයිට් ක්‍රිකට් ලීගය’ (Peterite Cricket League – PCL) එළඹෙන නොවැම්බර් 7 සහ 8 යන දිනවල බම්බලපිටිය ශාන්ත පීතර විද්‍යාලයීය ක්‍රීඩාංගණයේ දී පැවැත්වීමට නියමිතයි.
විවිධ පරම්පරාවල ක්‍රීඩකයින් එකට එකතු කර ගනිමින්, කනිෂ්ඨ මට්ටමේ සිට ක්‍රිකට් ක්‍රීඩාව ශක්තිමත් කිරීම සහ පාසලේ ක්‍රිකට් ක්‍රීඩාවේ අනාගතය නගාසිටුවීම මෙම තරගාවලියේ මූලික අරමුණ වී තිබේ. පීටරයිට් ක්‍රිකට් පදනමේ සභාපති හාන්ස් ප්‍රනාන්දු සහ PCL කමිටු සභාපති ලක්ෂාන් රොද්‍රිගෝ යන මහත්වරුන්ගේ මෙහෙයවීම යටතේ මෙම තරගාවලිය සංවිධානය කර ඇත.
මෙහි විශේෂත්වය වන්නේ ෆ්‍රැන්චයිස් (franchise) ක්‍රමවේදයක් යටතේ කණ්ඩායම් 8 ක් තරග වැදීමයි. ඒ සඳහා ‘තම්බපන්නි ලයන්ස්’ (Thambapanni Lions), ‘රෙසිස්ටන්ස් පැන්තර්ස්'(Resistance Panthers), ‘බම්බා පැට්‍රියට්ස්'(Bamba Patriots), ‘කොළඹ ස්පෝර්ට්ස් හබ්'(Colombo Sports Hub), ‘ටොප් නොක් ටයිටන්ස්’ (Top Knock Titans), , ‘කොළඹ ටස්කර්ස්'(Colombo Tuskers),, ‘ෆවුන්ඩේෂන් ගාඩියන්ස්'(Foundation Guardians සහ ‘යූ. කේ. පීටරයිට්ස්’ (UK Peterites) යන කණ්ඩායම් එක් වේ.
තරගාවලිය වඩාත් ආකර්ෂණීය කිරීම සඳහා එක් ඉනිමකට පන්දුවාර 6 බැගින් වන වේගවත් ආකෘතියක් යටතේ තරග ක්‍රියාත්මක වන අතර, එක් කණ්ඩායමකට ක්‍රීඩකයින් 8 දෙනෙකු ඇතුළත් වේ. විශේෂයෙන්ම පාසල් සිසුන්, වයස අවුරුදු 20-30, 30-40 සහ 40 ට වැඩි ආදී වශයෙන් විවිධ වයස් කාණ්ඩ නියෝජනය වන පරිදි ක්‍රීඩකයින් මෙම කණ්ඩායම්වලට ඇතුළත් කර තිබීම කැපී පෙනේ.
එමෙන්ම, මෙවර තරගාවලියේ ශූරතාව දිනා ගන්නා කණ්ඩායමට ‘ගරු සුනිල් හර්මන් පෙරේරා පියතුමා අනුස්මරණ ශූරතා කුසලානය’ ද, අනුශූරතාව දිනාගන්නා කණ්ඩායමට ‘ඔස්ටින් ප්‍රනාන්දු මහතා අනුස්මරණ පලිහ’ ද පිරිනැමීමට නියමිතය. මෙමඟින් ක්‍රීඩකයන්ට ගෞරවය පුද කිරීමත් සමඟ ශාන්ත පීතර ක්‍රීඩකයන් අතර පවතින සහෝදරත්වය හා වටිනාකම් තවදුරටත් ශක්තිමත් වනු ඇතැයි සංවිධායකයෝ අපේක්ෂා කරති.
