ශ්‍රී ලංකා ක්‍රිකට් ක්‍රීඩාවේ පරිපාලනය, පාලනය, නියාමනය, ප්‍රවර්ධනය සහ සංවර්ධනය වඩාත් විධිමත් කිරීමේ අරමුණින් සකස් කළ ශ්‍රී ලංකා ක්‍රිකට් පනත් කෙටුම්පත රජයේ ගැසට් පත්‍රය මගින් ප්‍රකාශයට පත් කර තිබේ.
මෙම පනත් කෙටුම්පත 2026 සැප්තැම්බර් 25 දිනැති අංක 2508 දරන ශ්‍රී ලංකා ප්‍රජාතාන්ත්‍රික සමාජවාදී ජනරජයේ ගැසට් පත්‍රයට ඇතුළත් කර ඇති අතර, එය සැප්තැම්බර් 28 දින නිකුත් කර තිබේ.
යෝජිත නව නීතිමය රාමුව යටතේ ශ්‍රී ලංකා ක්‍රිකට් පරිපාලනය සඳහා සාමාජිකයින් 14 දෙනෙකුගෙන් සමන්විත අධ්‍යක්ෂ මණ්ඩලයක් ස්ථාපිත කිරීමට යෝජනා කර ඇත.
ඒ අනුව,
- ස්වාධීන අධ්‍යක්ෂවරුන් 07 දෙනෙකු සහ
- නිලවරණයෙන් තේරී පත්වන අධ්‍යක්ෂවරුන් 07 දෙනෙකු
ලෙස අධ්‍යක්ෂ මණ්ඩලය සමන්විත වේ.
යෝජිත පනත් කෙටුම්පත මගින් ශ්‍රී ලංකා ක්‍රිකට් පරිපාලනයට වෘත්තීය දැනුම සහ විශේෂඥතාව සහිත පුද්ගලයන් එක් කර ගැනීම සඳහා ද අවස්ථාව සලසා තිබේ. ගිණුම්කරණ හා මූල්‍ය, නීති, අලෙවිකරණ, තොරතුරු තාක්ෂණය සහ ක්‍රිකට් පරිපාලනය ඇතුළු ක්ෂේත්‍රවල වෘත්තීය දැනුම සහ අත්දැකීම් සහිත පුද්ගලයන්ට ස්වාධීන අධ්‍යක්ෂ තනතුරු සඳහා අවස්ථාව හිමිවන පරිදි නව පරිපාලන ව්‍යුහය යෝජනා කර ඇත.
එමෙන්ම යෝජිත අධ්‍යක්ෂ මණ්ඩලයේ ස්වාධීන අධ්‍යක්ෂවරුන් අතරින් අවම වශයෙන් කාන්තා අධ්‍යක්ෂවරුන් දෙදෙනෙකු සිටිය යුතු බවට ද පනත් කෙටුම්පතේ විධිවිධාන ඇතුළත් කර තිබේ.
යෝජිත නව පරිපාලන ව්‍යුහය යටතේ අධ්‍යක්ෂ මණ්ඩල සාමාජිකයන්ගේ සාමාන්‍ය ධුර කාලය වසර 04ක් ලෙස යෝජනා කර ඇත.
එමෙන්ම නිලවරණයෙන් තේරී පත්වන අධ්‍යක්ෂවරුන්ට සේවය කළ හැකි උපරිම සමස්ත ධුර කාලය වසර 08කට සීමා කිරීමට ද යෝජනා කර තිබේ.
යෝජිත පනත් කෙටුම්පත අනුව අධ්‍යක්ෂ මණ්ඩලයේ සභාපතිවරයා ස්වාධීන අධ්‍යක්ෂවරුන් අතරින් ද, නියෝජ්‍ය සභාපතිවරයා නිලවරණයෙන් තේරී පත්වන අධ්‍යක්ෂවරුන් අතරින් ද තෝරා ගැනීමට නියමිතය.
ශ්‍රී ලංකා ක්‍රිකට් පරිපාලනයේ යහපාලනය, විනිවිදභාවය, වගවීම, අඛණ්ඩතාව සහ සමාන අවස්ථා තහවුරු කිරීම නව පනත් කෙටුම්පතේ ප්‍රධාන අරමුණු අතර වේ.
යෝජිත නීතිමය රාමුව යටතේ මූල්‍ය අක්‍රමිකතා, දූෂණය හෝ පරිපාලන අක්‍රමිකතා සම්බන්ධයෙන් විශ්වසනීය චෝදනා ඉදිරිපත් වූ අවස්ථාවලදී විගණන සහ විමර්ශන ආරම්භ කිරීමට තරුණ කටයුතු සහ ක්‍රීඩා අමාත්‍යවරයාට බලතල ලබාදීමට යෝජනා කර තිබේ. අවශ්‍ය අවස්ථාවලදී අධ්‍යක්ෂවරුන් හෝ අධ්‍යක්ෂ මණ්ඩලය සම්බන්ධයෙන් පනතේ සඳහන් ක්‍රියාමාර්ග ගැනීමට ද ප්‍රතිපාදන ඇතුළත් කර ඇත.
තවද, ශ්‍රී ලංකා ක්‍රිකට් ආයතනයේ විගණනය කළ ගිණුම් සහ වාර්ෂික වාර්තා පාර්ලිමේන්තුවට ඉදිරිපත් කිරීම සහ මහජනතාවට ප්‍රකාශයට පත් කිරීම සම්බන්ධයෙන් ද ප්‍රතිපාදන යෝජනා කර ඇත.
ශ්‍රී ලංකා ක්‍රිකට් ප්‍රතිව්‍යුහගත කිරීම සඳහා පනත් කෙටුම්පතක් සකස් කිරීමට 2026 ජුනි 08 දින පැවති අමාත්‍ය මණ්ඩල රැස්වීමේදී අනුමැතිය ලබා දී තිබූ අතර, නීති කෙටුම්පත් සම්පාදක දෙපාර්තමේන්තුව විසින් පනත් කෙටුම්පත සකස් කර ඇත. ඒ සඳහා නීතිපතිවරයාගේ නිෂ්කාශනය ද ලැබී තිබේ.
අමාත්‍ය මණ්ඩලය විසින් පනත් කෙටුම්පත ගැසට් පත්‍රයේ ප්‍රකාශයට පත් කර අනතුරුව පාර්ලිමේන්තුවේ අනුමැතිය සඳහා ඉදිරිපත් කිරීමට අනුමැතිය ලබා දී ඇත.
ඒ අනුව, ගැසට් කර ඇති ශ්‍රී ලංකා ක්‍රිකට් පනත් කෙටුම්පත ඉදිරියේදී පාර්ලිමේන්තුවට ඉදිරිපත් කර, පාර්ලිමේන්තු ක්‍රියාවලියට අනුව සම්මත කර ගැනීමට නියමිතය.
යෝජිත මෙම නව නීතිමය රාමුව ක්‍රියාත්මක වීමෙන් අනතුරුව ශ්‍රී ලංකා ක්‍රිකට් පරිපාලනය වඩාත් වෘත්තීය, විනිවිදභාවයෙන් යුතු සහ වගකීම් සහිත පරිපාලන ව්‍යුහයක් යටතට ගෙන ඒම අපේක්ෂිතය.
