හෙල්ල විසිකිරීම හෙවත් Javelin Throw ඉසව්ව බැලූ බැල්මට සරල ක්‍රීඩා ඉසව්වක් ලෙස පෙනුණත්, ජාත්‍යන්තර මට්ටමේ තරගයකදී භාවිත කරන හෙල්ලය සඳහා ඉතා නිශ්චිත තාක්ෂණික ප්‍රමිතීන් පවතී.
World Athletics නීති අනුව ජාත්‍යන්තර සහ World Rankings තරගවල භාවිත කරන හෙල්ල World Athletics විසින් නියම කර ඇති තාක්ෂණික ප්‍රමිතීන්ට අනුකූල විය යුතු අතර අදාළ තරග සඳහා World Athletics සහතික කළ (Certified) උපකරණ භාවිත කළ යුතුය.
පිරිමි හෙල්ලයේ බර සහ දිග
ජ්‍යෙෂ්ඨ පිරිමි (Men Senior) සහ පිරිමි U20 තරග සඳහා භාවිත කරන හෙල්ලයේ අවම බර ග්‍රෑම් 800 කි.
එහි සම්පූර්ණ දිග මීටර් 2.60 සිට මීටර් 2.70 දක්වා විය යුතුය.
එනම් ජාත්‍යන්තර පිරිමි තරගයකදී අප දකින හෙල්ලයක් සාමාන්‍යයෙන් මිනිසෙකුගේ උසටත් වඩා සැලකිය යුතු ලෙස දිගු, මීටර් 2.6කට වැඩි උපකරණයකි.
කාන්තා හෙල්ලයේ බර සහ දිග
ජ්‍යෙෂ්ඨ කාන්තා සහ U20 කාන්තා තරග සඳහා භාවිත කරන හෙල්ලයේ අවම බර ග්‍රෑම් 600 කි.
එහි සම්පූර්ණ දිග මීටර් 2.20 සිට මීටර් 2.30 අතර විය යුතුය.
වයස් කාණ්ඩ අනුව මෙම බර වෙනස් වේ. U18 පිරිමි තරග සඳහා ග්‍රෑම් 700 හෙල්ලයක් භාවිත කරන අතර U18 කාන්තා තරග සඳහා භාවිත කරන්නේ ග්‍රෑම් 500 හෙල්ලයකි.
ක්‍රීඩකයන් තමන්ගේම හෙල්ලය රැගෙන යනවාද?
මෙය බොහෝ දෙනාට ඇති වැදගත් ප්‍රශ්නයකි.
World Athletics නීති අනුව තරගයකට අවශ්‍ය හෙල්ල ඇතුළු throwing implements සාමාන්‍යයෙන් තරග සංවිධායකයන් විසින් සපයනු ලැබේ.
එහෙත් අදාළ තරගයේ නීති සහ Technical Delegateගේ අනුමැතිය මත ක්‍රීඩකයෙකුට තමන්ගේම පෞද්ගලික හෙල්ලයක් (Personal Javelin) තරගය සඳහා ඉදිරිපත් කිරීමටද අවස්ථාව තිබේ.
නමුත් තමන් කැමති ඕනෑම හෙල්ලයක් ගෙනැවිත් තරගයට භාවිත කළ නොහැක.
එම හෙල්ලය,
- World Athletics Certified උපකරණයක් විය යුතුය.
- තරගයට පෙර සංවිධායකයන්ගේ තාක්ෂණික නිලධාරීන් විසින් පරීක්ෂා කර අනුමත කළ යුතුය.
- අනුමත කිරීමෙන් පසු එය තරගය සඳහා නිල වශයෙන් සලකුණු කරනු ලැබේ.
- එසේ ඉදිරිපත් කරන පෞද්ගලික හෙල්ලයක් තරගයේදී අනෙකුත් ක්‍රීඩකයන්ටද භාවිත කිරීමට ලබාදිය යුතුය.
Technical Delegate විසින් වෙනත් තීරණයක් ගෙන නොමැති නම්, එක් ක්‍රීඩකයෙකුට එක් throwing event එකක් සඳහා තමන්ගේ උපකරණ දෙකකට වඩා ඉදිරිපත් කළ නොහැක.
ඒ අනුව, ක්‍රීඩකයෙකු තමන් පුහුණුවීම් සඳහා හුරු වූ හෙල්ලයක් ජාත්‍යන්තර තරගයකට රැගෙන ගියද, එය ඔහුගේ හෝ ඇයගේ පෞද්ගලික භාවිතයට පමණක් වෙන්කර තබාගත නොහැක. නිල අනුමැතිය ලැබීමෙන් පසු එය තරගයේ අනෙකුත් ක්‍රීඩකයන්ටද භාවිත කළ හැකි උපකරණයක් බවට පත්වේ.
හෙල්ලයක බර සහ දිග පමණක් ප්‍රමාණවත්ද?
නැත.
World Athletics විසින් හෙල්ලයක සම්පූර්ණ දිග සහ බරට අමතරව එහි Centre of Gravity, ලෝහ හිසෙහි දිග, shaft එකේ විෂ්කම්භය, grip එකේ පළල සහ හෙල්ලයේ හැඩය ඇතුළු තවත් තාක්ෂණික මිනුම් රැසක් නියම කර තිබේ.
උදාහරණයක් ලෙස ග්‍රෑම් 800 හෙල්ලයක shaft එකේ වැඩිම ඝනකම ඇති ස්ථානයේ විෂ්කම්භය මිලිමීටර් 25 සිට 30 අතර විය යුතු අතර grip එකේ පළල මිලිමීටර් 150 සිට 160 අතර විය යුතුය.
මේ නිසා ජාත්‍යන්තර තරගයකදී ක්‍රීඩකයෙකුගේ දක්ෂතාව පමණක් නොව, ඔහු හෝ ඇය භාවිත කරන හෙල්ලයද දැඩි ජාත්‍යන්තර තාක්ෂණික ප්‍රමිතීන් යටතේ පරීක්ෂාවට ලක් වේ.
හෙල්ල විසිකිරීම යනු ශක්තිය පමණක් නොව — තාක්ෂණය, නිරවද්‍යතාව සහ නිවැරදි උපකරණ එකට එක්වන ජාත්‍යන්තර මට්ටමේ අතිශය තාක්ෂණික ක්‍රීඩා ඉසව්වකි.
