ශූරයන්ගේ කුසලානයේ කවුරුත් පුල පුලා බලාසිටී තරගයක් වූ දකුණු අප්‍රිකාව හා ඕස්ට්‍රේලියාව අතර තරගය දැඩි වර්ෂාව නිසා එකදු පන්දුවක් හෝ නොයවා අතහැර දැමීමට සිදුවිය.
තරගය පැවැත්වීමට නියමිතව තිබුණේ පාකිස්තානයේ රාවල්පිණ්ඩි හීදී ය.
දකුණු අප්‍රිකාව හා ඕස්ට්‍රේලියාව මීට පෙර කිසිදු ශූරයන්ගේ කුසලාන තරගාවලියකදී මුණගැසී නොමැත. එම ඓතිහාසික අවස්ථාවද වර්ෂාවට සේදී ගියා.
තරගය අතහැර දැමීම නිසා කණ්ඩායම් දෙකටම එක් ලකුණු බැගින් හිමිවුණා.
ඒ අනුව ඔස්ට්‍රේලියාව හා දකුණු අප්‍රිකාව පිළිවෙලින් ඇෆ්ගනිස්තානය හා එංගලන්තය අතර මීළගට පැවැත්වීමට නියමිත තරග ජයග්‍රහණය කළහොත් එම කණ්ඩායම් 2 අවසන් පූර්ව වටයට පිවිසීමට නියමිතයි.
හෙට පැවැත්වීමට නියමිත ඇෆ්ගනිස්තානය හා එංගලන්තය අතර තරගය කණ්ඩායම් දෙකටම තීරණාත්මක. එම තරගයෙන් පරාජය වන කණ්ඩායමට තරගාවලියෙන් ඉවත්වීමට සිදුවනවා.
එසේම එම තරගයෙන් ජයගන්නා කණ්ඩායම අවසන් පූර්ව වටයට සුදුසුකම් ලැබීමට නම් ඉන් අනතුරුව පැවැත්වෙන තරගයද ජයග්‍රහණය කළයුතුයි.
