ලෝක කුසලාන විස්සයි විස්ස ක්‍රිකට් තරගාවලියේ ශ්‍රි ලංකාව සහභාගී වන අවසන් තරගය අද පකිස්තානය සමග පල්ලේකැලේ අන්තර්ජාතික ක්‍රිකට් ක්‍රීඩාංග‍ණයේදී පැවැත්වෙනවා.
සුපිරි 08 වටය යටතේ අවසන් පූර්ව වටයට සුදුසුකම් ලබාගන්නා දෙවැනි කණ්ඩායම තීරණය කිරීම සදහා මෙම තරගයේ තීරණය අතිශයින්ම තිරණාත්මකයි.
ශ්‍රී ලංකාව සහ පකිස්තානය අතර තරගය අද රාත්‍රී 7.00 ට ආරම්භ වනවා.
තරගාවලියේ මේ දක්වා පැවැති තරගවල ප්‍රතිඵලවලට අනුව දෙවන කාණ්ඩයෙන් එංගලන්තය සුපිරි 8 වටයට සුදුසුකම් ලබා අවසන්.
අද ශ්‍රී ලංකාව සහ පකිස්තානය අතර පැවැත්වෙන තරගයේ ප්‍රතිඵලයට අනුව පකිස්තානය හෝ නවසීලන්තය සුපිරි 8 වටයට සුදුසුකම් ලබනු ඇති.
ශ්‍රී ලංකාව ජයග්‍රහණය කළහොත් නවසීලන්තය සෘජුවම සුපිරි 8 වටයට සුදුසුකම් ලබනවා.
ශ්‍රී ලංකාව පරාජය වුවහොත් පකිස්තානයට සුපිරි 8 වටයට සුදුසුකම් ලබාගැනීම සදහා ශ්‍රී ලංකාවට එරෙහිව ලකුණු 64 ක අවම ලකුණු පරතරයකින් තරගය ජයග්‍රහණය කළ යුතුයි.
එසේ නොමැතිනම් ශ්‍රී ලංකාව මුලින් පන්දුවට පහරදී ලබාදෙන ඉලක්කය පන්දුවාර 13 යි පන්දුවකට අඩු පන්දු සංඛ්‍යාවකින් හඹා යා යුතුයි.
යම් හෙයකින් පකිස්තානය අවසන් පූර්ව වටයට සුදුසුකම් ලබාගත හොත් එම තරගය ශ්‍රී ලංකාවේදී පැවැත්වෙනු ඇති.
ශ්‍රී ලංකාව සහ පකිස්තානය අතර මේ දක්වා විස්සයි විස්ස තරග 29 ක් පවත්වා ඇති අතර ඉන් තරග 17 ක් පකිස්තානයත්, තරග 12 ක් ශ්‍රි ලංකාවත් ජයගත්තා.
මේ අතර විස්සයි විස්ස ලෝක කුසලාන තරගාවලින් හිදී දෙරට අතර පවත්වා ඇති තරග සංඛ්‍යාව 4 ක් ඉන් තරග දෙක බැගින් දෙපිලම ජයගෙන තිබෙනවා.
මේ අතර දෙරට අතර විස්සයි විස්ස ලෝක කුසලානයකදී තරගයක් පැවැත්වෙන්නේ 2012 වසරින් පසුවයි.
අද තරගයට ශ්‍රි ලංකා කණ්ඩායමේ නිත්‍ය කඩුලු රකින්නා වන කුසල් මෙන්ඩිස් ආබාදයක් හේතුවෙන් සහභාගී වන්නේ නැහැ.
ඒ වෙනුවට කමිල් මිෂාර කඩුලු රකින්නා ලෙස කටයුතු කිරීමට නියමිත බවයි වාර්තා වන්නේ.
