එංගලන්තය හා නවසීලන්තය අතර තරග තුනකින් සමන්විත ටෙස්ට් ත්‍යරගාවලියේ දෙවන තරගය ඊයේ අවසන් වුණා. එම තරගය ලකුණු 253කින් ජයගැනීමට සමත් වුණේ නවසීලන්ත කණ්ඩායමයි. තරගය පැවැත්වුණේ ඕවල් පිටියේදී යි.
පලමුවෙන් පන්දුවට පහරදුන් නවසීලන්ත කණ්ඩායම සිය පළමු ඉනිමට ලකුණු 391ක් ලබාගත්තා. එම ඉනිමේදී ග්ලේන් ෆිලිප්ස් සිය පළමු ටෙස්ට් ශතකය වාර්තා කිරීමට සමත් වුණා. ෆිලිප්ස් පන්දු 135ට ලකුණු 100ක් ලබාගත් අතර ටොම් බන්ඩ්ල් ලකුණු 51ක් ලබාගත්තා.
නවසීලන්ත පළමු ඉනිමේ කඩුලු ලබාගැනීමේදී ජේකබ් බෙතල් කඩුලු 3ක් ලබාගත් අතර ජොෆ්‍රා ආචර්, මැතිව් ෆිෂර් හා සෝනි බේකර් කඩුලු 2 බැගින් දවාගත්තා.
එංගලන්ත කණ්ඩායම සිය පළමු ඉනිමට ලබාගත්තේ ලකුණු 291ක් පමණයි. එහිදී එමිලෝ ගේ හා මැතිව් ෆිෂර් පිළිවෙලින් ලකුණු 53ක් හා ලකුණු 50ක් ලබාගත්තා. පන්දු යැවීමේදී නවසීලන්තය වෙනුවෙන් මැට් හෙන්රි ලකුණු 80ට කඩුලු 5ක් දවාගැනීමට සමත් වුණා.
ලකුණු 100ක් ඉදිරියෙන් සිය දෙවනි ඉනිම ආරම්භ කළ නවසීලන්තය ඉනිම අවසානයේ ලකුණු 362ක් ලබාගත්තා. එහිදී හෙන්රි නිකල්ස් ලකුණු 121ක් ලබාගත් අතර ඩැරල් මිචෙල් ලකුණු 68ක් හා රචින් රවීන්ද්‍ර ලකුණු 76ක් ලබාගත්තා. එංගලන්තය වෙනුවෙන් ආචර් හා මැතිව් ෆිෂර් කඩුලු 3 බැගින් දවාගත්තා.
ලකුණු 463ක ඉලක්කයක් හඹා යාමට පිටියට පිවිසි එංගලන්ත කණ්ඩායමට සිය දෙවනි ඉනිමට ලබාගත හැකිවූයේ ලකුණු 209ක් පමණයි. එංගලන්ත දෙවන ඉනිම වෙනුවෙන් ජෝ රූට් ලකුණු 77ක් හා හැරී බෲක් ලකුණු 58ක් ලබාගත් අතර පන්දු යැවීමේදී මැට් හෙන්රි කඩුලු 6ක් හා කයිල් ජේමිසන් කඩුලු 3ක් දවාගත්තා. හෙන්රි මෙම තරග්‍යේදී කඩුලු 11ක් ලබාගත් අතර එය ටෙස්ට් තරගයකදී ඔහු කඩුලු 10ක් ලබාගත් ප්‍රථම අවස්ථාව ද විය.
ඒ අනුව මෙම ටෙස්ට් තරගය ලකුණු 253කින් ජයගත් නවසීලන්තය තරගාවලිය තරග 1-1ක් ලෙස සමකිරීමට සමත් වුණා. මෙම තරගාවලිය ලෝක ටෙස්ට් ශූරතාවයේ තරගාවලියක් වන අතර එම ප්‍රසාද ලකුණු සටහනේ නවසීලන්තය මේ වන විට සිව් වන ස්ථානයේ පසුවන අතර එංගලන්තය සිටින්නේ හත්වැනි ස්ථානයේ යි.
