ඕස්ට්‍රේලියානු කණ්ඩායමේ බිහි වූ විශිෂ්ටතම මෙන්ම ප්‍රවේගකාරීම තුන් ඉරියව් ක්‍රීඩකයෙකු වන ග්ලේන් මැක්ස්වෙල් (Glenn Maxwell) ජාත්‍යන්තර ක්‍රිකට් පිටියෙන් සමුගැනීමට තීරණය කර තිබේ. ‘The
Big Show’ යන අන්වර්ථ නාමයෙන් හඳුන්වනු ලැබූ 38 හැවිරිදි මැක්ස්වෙල්, සිය වසර 14 ක ජාත්‍යන්තර ක්‍රිකට් දිවියට මෙලෙස සමුදෙන්නේ ක්‍රිකට් ලෝලීන් මවිත කළ අමතක නොවන මතක රැසක් ඉතිරි කරමිනි.
මෑතකදී නිමාවට පත් වූ විස්සයි20 ලෝක කුසලාන තරගාවලියේදී ඕමාන කණ්ඩායමට එරෙහිව පැවති තරගය තමාගේ අවසන් ජාත්‍යන්තර තරගය ලෙස ක්‍රීඩා කළ බව ඔහු පැවසුවා.
කණ්ඩායමේ ඉදිරි අනාගතය සහ තරුණ ක්‍රීඩකයින්ට අවස්ථාව ලබා දීමේ අරමුණින්, කළමනාකාරීත්වය සමඟ සාකච්ඡා කිරීමෙන් පසු මෙම තීරණයට එළඹුණු බව ඔහු ප්‍රකාශ කර ඇත. කෙසේ වෙතත්, ඔහු ඉදිරියේදී T20 ලීග තරග සඳහා දිගටම ක්‍රීඩා කිරීමට අපේක්ෂා කරයි.
ග්ලේන් මැක්ස්වෙල්ගේ ජාත්‍යන්තර ක්‍රිකට් දත්ත (Career Stats)
සිය ක්‍රීඩා දිවිය තුළ ආක්‍රමණශීලී පිතිහරඹයකින් සහ දක්ෂ පිට දඟ පන්දු යැවීමකින් ඕස්ට්‍රේලියානු කණ්ඩායම ජයග්‍රහණ රැසකට රැගෙන යාමට මැක්ස්වෙල් සමත් වුණා.
එදිනෙදි තරග (ODIs): තරග 149 කදී ලකුණු 3,990 ක් රැස් කර ඇති අතර, ඊට විශිෂ්ට ශතක සහ අර්ධ ශතක රැසක් ඇතුළත් වේ. ඔහුගේ ප්‍රහාරක වේගය (Strike Rate) 126.7 ක් ලෙස සටහන් වේ. විශේෂයෙන්ම, 2023 එක්දින ලෝක කුසලාන තරගාවලියේදී ඇෆ්ගනිස්ථානයට එරෙහිව දැඩි ශාරීරික අපහසුතා මධ්‍යයේ ඔහු ලබාගත් ද්විත්ව ශතකය (නොදැවී ලකුණු 201*) ක්‍රිකට් ඉතිහාසයේ අද්විතීය ඉනිමක් ලෙස සෑලකේ.
විස්සයි20 ජාත්‍යන්තර තරග (T20Is): තරග 130 කට ක්‍රීඩා කර ඇති මැක්ස්වෙල්, 154.42 ක ඉහළ ප්‍රහාරක වේගයකින් යුතුව ලකුණු 2,897 ක් ලබා ගෙන තිබේ. ජාත්‍යන්තර විස්සයි20 පිටියේ ශතක 5ක් රැස් කර ඇති ඔහු, ශ්‍රී ලංකාවට එරෙහිව පල්ලෙකැලේදී රැස් කළ නොදැවී ලකුණු 145* ඔහුගේ ඉහළම ලකුණු සංඛ්‍යාව යි.
ටෙස්ට් තරග (Tests): ඕස්ට්‍රේලියාව වෙනුවෙන් ටෙස්ට් තරග 7 කට ක්‍රීඩා කර ඇති ඔහු, ඉන්දියාවට එරෙහිව ශතකයක් ද වාර්තා කොට තිබේ.
කඩුලු : සුවිශේෂී දකුණත් පිට දඟ පන්දු යවන්නෙකු වන මැක්ස්වෙල්, ජාත්‍යන්තර ක්‍රිකට් පිටියේ කඩුලු 136 ක් බිඳ දමා තිබේ.
ඕස්ට්‍රේලියාව ජයග්‍රහණය කළ 2015 සහ 2023 එක්දින ලෝක කුසලානවලදී මෙන්ම 2021 විස්සයි20 ලෝක කුසලාන ජයග්‍රහණයේදී ද මැක්ස්වෙල්ගේ දායකත්වය අතිශයින් තීරණාත්මක වුණා.
ක්‍රිකට් ක්‍රීඩාවට නව මානයක් හා නව ජවයක් එකතු කළ ක්‍රීඩකයෙකු ලෙස ග්ලේන් මැක්ස්වෙල් ක්‍රීඩකයන්ගේ මෙන්ම ලොව පුරා සිටින ක්‍රීඩාලෝලීන්ගේ හදවත්වල සදානුස්මරණීය ලෙස රැඳෙනු නියතයි.
