ඉන්දියාව හා දකුණු අප්රිකාව අතර තරග තුනකින් සමන්විත එක්දින තරගාවලියේ දෙවන තරගය ඊයේ රායිපූර් හීදී පැවැත්වුණා. එම තරගය ලකුණු 358ක් හඹාගොස් කඩුලු 4ක ජයක් ලැබීමට දකුණු අප්රිකාව සමත් වුණා.
කාසියේ වාසිය දිනූ දකුණු අප්රිකානු නායක ටෙම්බා බවුමා රාත්රී කාලයේ පින්න ඇදවැටීම නිසා මුලින්ම පන්දු රැකීමට තීරණය කළා.
ඒ අනුව මුලින් පන්දුවට පහරදුන් ඉන්දීය කණ්ඩායම කඩුලු 5ක් දැවී ලකුණු 358ක දැවැන්ත ලකුණු පුවරුවක් නිර්මාණය කළා.
පිට පිට ලබාගත් දෙවන ශතකයත් සමගින් විරාත් කෝලී සිය 53න් වන එක්දින ශතකය වාර්තා කළේ පන්දු 93ට ලකුණු 102ක් ලබාගනිමින්. සිය එක්දින දිවියේ මංගල ශතකය ලබාගනිමින් රුතුරාජ් ගයික්වාද් පන්දු 83ට ලකුණු 105ක් ලබාගත්තා. මීට අමතරව පන්දු 43කින් නොදැවී ලකුණු 66ක් ලබාගෙන ඉන්දීය නායක කේ. එල්. රාහුල් ලකුණු ඉනිම අවසන් කළා.
දකුණු අප්රිකාව වෙනුවෙන් මාකෝ යැන්සන් කඩුලු 2ක් හා නන්ද්රෙ බර්ගර් හා ලුන්ගි න්ගිඩි එක් කඩුල්ල බැගින් ලබාගත්තා.
පිලිතුරු ඉනිම ක්රීඩා කළ දකුණු අප්රිකානු කණ්ඩායම තරගයේ අවසන් පන්දුවාරයේදී කඩුලු 6ක් දැවී ලකුණු 362ක් ලබාගෙන ඉන්දීය කණ්ඩායමට එරෙහි හොඳම සාර්ථක හඹායාම සමකිරීමට සමත් වුණා.
ඒඩ්න් මාක්රම් පන්දු 98ට ලකුණු 110ක් ලබාගත්තා. ඒ ඔහු හඹායන ඉනිමකදී ලබාගත් පළමු ශතකයයි. ඊට අමතරව ටෙම්බා මවූමා ලකුණු 46ක්, මැතිව් බ්රීට්ස්කෙ ලකුණු 68ක් හා ඩෙවාල්ඩ් බ්රෙවිස් ලකුණු 54ක් ලබාගත්තා.
ඉන්දීය කණ්ඩායම වෙනුවෙන් පන්දු යැවීමේදී ආර්ශ්දීප් සිං හා ප්රසිද් ක්රිෂ්නා කඩුලු 2 බැගින් දවාගත්තා.
මෙම ජයග්රහණයත් සමග මෙම තරගාවලිය තරග 1-1ක් ලෙස සම කිරීමට දකුණු අප්රිකාව සමත් වුණා. තීරණාත්මක තුන්වන හා අවසාන තරගය 6වන සෙනසුරාදා විශාකාපට්නම් හීදී පැවැත්වීමට නියමිතයි.
