ශ්‍රී ලංකාව සහ බටහිර ඉන්දීය කොදෙව් කණ්ඩායම් අතර දෙවැනි ටෙස්ට් ක්‍රිකට් තරගයේ තුන්වැනි දිනය අදයි.
ඊයේ දෙවැනි දිනය සඳහා තරගය නතර කරන විට කොදෙව් කණ්ඩායම් පළමු ඉනිමට කඩුල්ලක් දැවී ලකුණු 58ක් ලබා සිටියා. තරගය පැවැත්වෙන්නේ, ඇන්ටිගුවාහිදී.
ඊයේ දෙවැනි දිනයට තරගය ආරම්භ කරන විට ශ්‍රී ලංකා ක්‍රීඩකයින් පළමු ඉනිමට කඩුලු 5ක් දැවී ලකුණු 338ක් ලබා සිටියා.
නොදැවී පන්දුවට පහරදෙමින් සිටියේ, කුසල් මෙන්ඩිස් සහ සොනාල් දිනූෂ.
තම ටෙස්ට් ක්‍රිකට් දිවියේ 23 වැනි අර්ධ ශතකය වාර්තා කළ කුසල් මෙන්ඩිස් ලකුණු 69ක් රැස් කළා.
සොනාල් දිනූෂ වාර්තා කළේ, තම ටෙස්ට් ක්‍රිකට් දිවියේ පළමුවැනි අර්ධ ශතකයයි.
ඔහු ලකුණු 92කට දැවී ගියා. ශ්‍රී ලංකා කණ්ඩායම පළමු ඉනිමට කඩුලු 09ක් දැවී ලකුණු 549ක් ලබා සිටියදී ඉනිම අත්හිටුවීමට තීරණය කළා.
පන්දු යැවීමේදී ජේඩ්න් සීල්ස් සහ ෂෙමර් ජෝෂප් කඩුලු 02 බැගින් බිඳ හෙලුවා.
