ශ්‍රී ලංකාව, පාකිස්තානය හා එංගලන්තය අතර ආරම්භ වූ තුන්කොන් එක්දින තරගාවලියේ පළමු තරගය ඊයේ ශ්‍රී ලංකාව හා පාකිස්තානය අතර පැවැත්වුණා. එම තරගය ලකුණු 37කින් ජයගැනීමට සමත් වුණේ පාකිස්තානය යි.
රාවල්පිණ්ඩි ක්‍රීඩා පිටියේදී පැවති තරගයේ කාසියේ වාසිය දිනූ ශ්‍රී ලංකා නායක කුසල් මෙන්ඩිස් පලමුවෙන් පන්දු රැකිම තෝරාගත්තා.
ඒ අනුව ඉනිම ආරම්භ කළ පාකිස්තාන් ආරම්භක පිතිකරුවන් වන ෆකාර් සමාන් හා සයීම් අයූබ් පලමු කඩුල්ලට ලකුණු 23ක සබදතාවයක් ගොඩානගා තිබියදී අයූබ් දවාගැනීමට දිල්ශාන් මධුසංක සමත් වූ අතර මුලු ලකුණු සංඛ්‍යාව ලකුණු 32ක්ව තිබියදී ෆකාර් සමාන්ගේ කඩුල්ලද දවාගැනීමට ඔහු සමත් වුණා.
ඉන්පසු තුන්වන කඩුල්ලට බාබර් අසාම් හා නවක ක්‍රීඩක සාද් බේග් ලකුණු 74ක සබදතාවයක් ගොඩනැගූ අතර පාකිස්තාන් ඉනිමේ තීරණාත්මක සබදතාවය ලෙස පස්වන කඩුල්ල වෙනුවෙන් ලකුණු 97ක සබඳතාවයක් ගොඩනැගීමට සල්මන් අලී අගා හා හසන් නවාස් සමත් වුණා.
සිය සිව්වන එක්දින ශතකය වාර්තා කරමින් සල්මාන් අගා පන්දු 90ට ලකුණු 107ක් ලබාගැනීමට සමත් වුණා.
ඊට අමතරව බාබර් අසාම් ලකුණු 45ක් හා සාද් බේග් ලකුණු 39ක් ලබාගත්තා.
ශ්‍රී ලංකාව වෙනුවෙන් පන්දු යැවිම සඳහා නිත්‍ය පන්දු යවන්නන් සිව් දෙනෙකු ක්‍රීඩා කළා. ඒ අසිත ප්‍රනාන්දු, දිල්ශාන් මධුසංක, එෂාන් මාලිංග හා සචිඳු කොලඹගේ යි. ඒ අනුව ශ්‍රී ලංකා නායක කුසල් මෙන්ඩිස් හට තවත් පන්දුවාර 10ක් යැවීම සඳහා අර්ධ කාලීන පන්දු යවන්නන් යොදා ගැනීමට සිදු වූ අතර එම පන්දු වාර 10ට ලකුණු 68ක් ලබාගැනීමට පාකිස්තාන් පිතිකරුවන් සමත් වුණා.
කෙසේ වෙතත්, ශ්‍රී ලංකා වේගපන්දු යවන්නන් පාකිස්තාන් ඉණිම අවසන් පන්දුවාර පහේදී තමන්ගේ ග්‍රහණයට නතුකරගැනීමට සමත් වෙමින් ලකුණු 26ට කඩුලු 5ක් දවාගෙන පාකිස්තාන් කණ්ඩායමේ සියලු කඩුලු තවත් එක් පන්දුවක් ඉතිරිව තිබියදී දවාගැනීමට සමත් වුණා.
ඒ අනුව පාකිස්තාන් කණ්ඩායම සිය ඉනිමට සියලු දෙනා දැවී ලකුණු 305ක් රැස් කිරීමට සමත් වුණා.
ලකුණු 306ක ඉලක්කයක් හඹායාම සඳහා පිටියට පිවිසි ශ්‍රී ලංකා ආරම්භක පිතිකරුවන් හට, පාකිස්තාන් වේග පන්දු යවන්නන්ගේ දෝලනය හමුවේ, ලබාගැනිමට හැකිවුණේ මන්දගාමි ආරම්භයක්.
ශ්‍රී ලංකා කණ්ඩායම පළමු පවර් ප්ලේ පන්දුවාර 10ට ලබාගත්තේ කඩුලු 1ට ලකුණු 42ක් පමණයි.
ශ්‍රී ලංකාව අතින් ගිලිහී යමින් තිබූ තරගය නැවත සිය ග්‍රහණයට ගැනීමට පවන් රත්නායක හා ජනිත් ලියනගේ පස්වන කඩුල්ලට ලබාගත් ලකුණු 119ක සබඳතාවය හේතු වුණා.
එහිදී පවන් රත්නායක ලකුණු 79ක් හා ජනිත් ලියනගේ ලකුණු 60ක් ලබාගත්තා.
ශ්‍රී ලංකා ඉනිමේ අවසන් පන්දුවාර 10 මෙම තරගයේ ජයග්‍රහණය ශ්‍රී ලංකාවෙන් ඈත් කළා. අවසන් පන්දුවාර 10දී ලකුණු 44ට කඩුලු 5ක් දැවී ගියා.
ශ්‍රී ලංකා ඉනිමේ 49වන පන්දුවාරයේදී සියලු කඩුලු 268ට දැවී ගිය අතර පාකිස්තානයට ලකුණු 37ක ජයක් හිමි වුණා.
ඒ අනුව මෙම තුන්කොන් තරගාවලියේ පෙරමුණ ගැනීමට සත්කාරක පාකිස්තාන් කණ්ඩායම සමත් වුණා.
හෙට දිනයේදී (20) පාකිස්තානය හා එංගලන්තය තරග වැදීමට සූදානම් අතර ශ්‍රී ලංකාව හා එංගලන්තය අතර තරගය එළඹෙන 22 දා පැවැත්වීමට සූදානම්.
