මධ්‍යම ආසියානු වෙරළ වොලිබෝල් තරගාවලියේ පිරිමි අංශයේ ශූරතාව හිමිකර ගැනීමට ශ්‍රී ලංකා කණ්ඩායම සමත්වුණා. තරගාවලිය පැවැත්වුනේ භූතානයේදී.
මධ්‍යම ආසියානු වොලිබෝල් සම්මේලනය විසින් තරගාවලිය සංවිධාන කර තිබුණා. ඊට ඉන්දියාව, මාලදිවයින, නේපාලය, උස්බෙකිස්තානය, බංගලාදේශය, භූතානය සහ ශ්‍රී ලංකාව නියෝජනය කරමින් කණ්ඩායම් එක්ව සිටිනවා.
මෙහි පිරිමි අංශයේ අවසන් තරගයට සුදුසුකම් ලබාගත්තේ ශ්‍රී ලංකාව සහ ඉන්දියාවයි. එහි පළමු වටය ලකුණු 21 ට 18 ක් ලෙස ජයගැනීමට ශ්‍රී ලංකා ක්‍රීඩකයින් සමත්වුනා. ඔවුන් දෙවන වටය ජයගත්තේ ලකුණු 21 ට 14 ක් ලෙසයි.
ඒ අනුව වට 2 ට 0 ක් ලෙස අවසන් තරගය ජයගත් ශ්‍රී ලංකා කණ්ඩායමට තරගාවලියේ රන් පදක්කම හිමිවුනා. මෙහිදී ශ්‍රී ලංකා කණ්ඩායම නියෝජනය කලේ සදුන් මධුශංක සහ දිලීප චාමික සෙනෙවිරත්නයි.
තුර්කි ජාතික ඕනූර් අර්ගුන් මහතා කණ්ඩායමේ ප්‍රධාන පුහුණුකරු ලෙස කටයුතු කරනවා. ශ්‍රී ලංකා කණ්ඩායමක් මධ්‍යම ආසියානු වෙරළ වොලිබෝල් තරගාවලියක රන් පදක්කම දිනූ පළමු අවස්ථාව මෙයයි.
