තම ටෙස්ට් ක්‍රිකට් දිවියේ ලකුණු දහසේ සීමාව පසු කිරීමට ශ්‍රී ලංකා ක්‍රීඩක පැතුම් නිස්සංක අද සමත් වුණා. ඒ, බංග්ලාදේශය සමග පැවැත්වෙන පළමු ටෙස්ට් ක්‍රිකට් තරගයේ තුන්වැනි දිනයේදී. තරගය ගාල්ල අන්තර්ජාතික ක්‍රිකට් ක්‍රීඩාංගනයේදී පැවැත්වෙනවා.
අද දිනය ආරම්භ කරන විට බංග්ලාදේශය තම පළමු ඉනිමට කඩුලු 9 ක් දැවී ලකුණු 484 ක් ලබා සිටියා. ඔවුන්ගේ පළමු ඉනිම සීමා වුණේ, ලකුණු 495 කට. බංග්ලාදේශ ඉනිමේදී ශතක දෙකක් වාර්තා වුණා. පන්දු යැවීමේදී ශ්‍රී ලංකාව වෙනුවෙන් අසිත ප්‍රනාන්දු කඩුලු 04ක් බිඳ හෙලුවා. මිලාන් රත්නායක සහ තරිඳු රත්නායක අතර කඩුලු 03 බැගින් බිඳී ගියා.
අනතුරුව, ශ්‍රී ලංකා පළමු ඉනිම ආරම්භ කළේ, පැතුම් නිස්සංක සහ ලහිරු උදාර. පළමු කඩුල්ල ලෙස ලහිරු උදාර ලකුණු 29 කට දැවී ගියා. අනතුරුව දිනේෂ් චන්දිමාල් සහ පැතුම් නිස්සංක දෙවැනි කඩුල්ලට ලකුණු 157ක සබඳතාවක් ගොඩනැගුවා. චන්දිමාල් අද වාර්තා කළේ, තම ටෙස්ට් ක්‍රිකට් දිවියේ 33 වැනි අර්ධ ශතකය. ඔහු ලකුණු 54කට දැවී ගියා.
තම අවසන් ටෙස්ට් ක්‍රිකට් තරගයට ක්‍රීඩා කරන ඇන්ජලෝ මැතීව්ස් පිතිකරණය සඳහා පිටියට පිවිසියේ ඉන් අනතුරුවයි. පැතුම් නිස්සංක අද වාර්තා කළේ, තම ටෙස්ට් ක්‍රිකට් දිවියේ තුන්වැනි ශතකයයි. ඔහු බංග්ලාදේශයට එරෙහිව ලබාගත් පළමු ශතකය ද මෙයයි. ඇන්ජලෝ සහ පැතුම් නිස්සංක අතර තුන්වැනි කඩුල්ලට ගොඩනැගුණු ලකුණු 89ක සබඳතාව බිඳ වැටුණේ, ඇන්ජලෝ ලකුණු 39කට දැවී යාමත් සමගයි. පැතුම් නිස්සංක ලකුණු 187ක් ලබා සිටියදී සිව්වැනි කඩුල්ල ලෙස දැවී ගියා. ඔහු තම ටෙස්ට් ක්‍රිකට් දිවියේ ඉනිමක ලබාගත් වැඩිම ලකුණු සංඛ්‍යාව මෙයයි.
අද දිනය නිමාවන විට ශ්‍රී ලංකාව පළමු ඉනිමට කඩුලු 04ක් දැවී ලකුණු 368ක් ලබා සිටියා. කමිඳු මෙන්ඩිස් නොදැවී ලකුණු 37ක් රැස් කරගෙන සිටි අතර, නායක ධනංජය ද සිල්වා නොදැවී ලකුණු 17යි.
