විස්සයි විස්ස ලෝක කුසලානයට බලාපොරොත්තු වූ කණ්ඩායම ලැබුණා.. අපි කුසලානය ගේනවා..!!

Read More

Cricket

වනිඳු හසරංග සහ ශකීබ් අල් හසන් 20-20 තුන් ඉරියව් ක්‍රීඩක ශ්‍රේණිගත කිරීම්වල පළමු ස්ථානයට..!!

20-20 තුන් ඉරියව් ක්‍රීඩකයින්ගේ ශ්‍රේණිගත කිරීම්වල පළමු ස්ථානයට පැමිණීමට ශ්‍රී ලංකා නායක වනිඳු හසරංග සහ බංග්දේශ තුන් ඉරියව් ක්‍රීඩක ශකීබ් අල් හසන් සමත්ව තිබෙනවා. අන්තර් ජාතික ක්‍රිකට් කවුන්සිලය නවතම ශ්‍රේණිගත කිරීම අද ප්‍රකාශයට පත් කළා. පළමු ස්ථානයේ පසු වන වනිඳු හසරංගට සහ ශකීබ් අල් හසන්ට හිමිව ඇති ශ්‍රේණිගත කිරීම් ලකුණු සංඛ්‍යාව 228 ක්. 20-20 අන්තර් ජාතික තරග 65 කදී ශ්‍රී ලංකාව නියෝජනය කර ඇති වනිඳු පන්දු යවන්නෙකු ලෙස බිඳ හෙලා ඇති කඩුලු සංඛ්‍යාව 104 ක්. ඔහුගේ හොඳම පන්දු යැවීම ලෙස සටහන් වන්නේ, ලකුණු 9 කට කඩුලු 4 ක් බිඳ හෙලීමයි. මේ අතර, පිතිකරුවෙකු ලෙස ලකුණු 650 ක් රැස් කිරීමට වනිඳු හසරංග සමත්ව තිබෙනවා. වනිඳු තරගයක රැස් කර ඇති වැඩිම ලකුණු සංඛ්‍යාව 71 ක්. මෙවර, ලෝක කුසලාන 20-20 ක්‍රිකට් තරගාවලියේදී ශ්‍රී ලංකා කණ්ඩායමට නායකත්වය ලබා දෙන්නේ ද වනිඳු හසරංග.

මැයි 15, 2024 - Sudarsha Warnakulasooriya

අයර්ලන්තය සමග පැවති තෙවැනි ක්‍රිකට් තරගය, කඩුලු 6 කින් ජය ගැනීමට පාකිස්තානය සමත්වෙයි..!!

අයර්ලන්තය සමග පැවති තෙවැනි ක්‍රිකට් තරගය, කඩුලු 6 කින් ජය ගැනීමට පකිස්තානය සමත් වුණා. පකිස්තානය තරගාවලිය ජය ගත්තේ, තරග 2 ට 1 ක් ලෙසයි. ඩබ්ලින් හිදී පැවැති තරගයේ, පළමුවෙන් පන්දුවට පහර දුන්නේ, අයර්ලන්තයයි. ඔවුන් පන්දුවාර 20 ඇතුළත කඩුලු 7 ක් දැවී ලකුණු 178 ක් රැස් කළා. නායක ලූකන් ටකර් ලකුණු 73 යි. පන්දු යැවීමේදී ෂහින්ෂා අෆ්රිඩි කඩුලු 3 ක් දවා ගත්තා. පිළිතුරු ලෙස පකිස්තානය තරගය ජය ගත්තේ, පන්දුවාර 17 කදී කඩුලු 4 ක් දැවී ලකුණු 181 ක් රැස් කරමින්. නායක බාබර් අසාම්, පන්දු 42 කදී ලකුණු 75 යි. ඔහුගේ ඉනිමට 4 පහර 6 ක් සහ 6 පහර 5 ක් ඇතුළත්. මොහොමඩ් රිස්වාන් ලකුණු 56 යි.

මැයි 15, 2024 - Sudarsha Warnakulasooriya

අන්තර් සමාජ T20 ක්‍රිකට් තරගාවලියේ පොලිස් කණ්ඩායම සමග තරගය ලකුණු 46 කින් ජය ගැනීමට CCC කණ්ඩායම සමත්වෙයි..!!

අන්තර් සමාජ 20-20 ක්‍රිකට් තරගාවලියේ පොලිස් කණ්ඩායම සමග ඊයේ පැවති තරගය ලකුණු 46 කින් ජය ගැනීමට සීසීසී කණ්ඩායම සමත් වුණා. තරගය පැවැත්වුණේ, කොළඹ එස්එස්සී ක්‍රීඩාංගණයේදී. පළමුවෙන් පන්දුවට පහර දුන් සීසීසී කණ්ඩායම පන්දුවාර 20 ඇතුළත කඩුලු 7 ක් දැවී ලකුණු 157 ක් රැස් කළා. ලසිත් කෲස්පුල්ලේ ලකුණු 48 ක් සහ පවන් පතිරාජ ලකුණු 46 ක් රැස් කළා. පන්දු යැවීමේදී සුපුන් මධුශංක කඩුලු 4 යි. පිළිතුරු ලෙස පොලිස් කණ්ඩායමට පන්දුවාර 19 පන්දු 4 කදී සියලු ක්‍රීඩකයින් දැවී රැස් කිරීමට හැකි වූයේ ලකුණු 129 ක් පමණයි. හේෂාන් ධනුෂ්ක ලකුණු 48 යි. පන්දු යැවීමේදී ඉසුරු උදාන, අෂාන් ප්‍රියන්ජන්, ලක්ෂාන් සඳකැන් සහ චතුරංගද සිල්වා කඩුලු ‍2 බැගින් බිඳහෙලුවා. එම තරගාවලිය යටතේ, නුගේගොඩ ක්‍රීඩා සමාජය සමග පැවති තරගය කඩුලු 7 කින් ජය ගැනීමට එන් සී සී කණ්ඩායම සමත් වුණා. තරගය පැවැත්වුණේ, බ්ලූම් ෆීල්ඩ් ක්‍රීඩාංගනයේදී. තරගයේ පළමුවෙන් පන්දුවට පහර දුන් නුගේගොඩ කණ්ඩායම පන්දුවාර 19 යි පන්දුවකදී සියලු ක්‍රීඩකයින් දැවී ලකුණු 132 ක් රැස් කළා. ඇන්ජලෝ පෙරේරා ලකුණු 34 යි. පන්දු යැවීමේදී චාමික කරුණාරත්න සහ ලසිත් ඇඹුල්දෙණිය කඩුලු 3 බැගින් බිඳහෙලුවා. පිළිතුරු ලෙස එන් සී සී කණ්ඩායම තරගය ජය ගත්තේ, පන්දුවාර 12 යි පන්දුවක් ඇතුළත කඩුලු 3 ක් දැවී ලකුණු 135 ක් රැස් කරමින්. කමිල් මිෂාර ලකුණු 63 ක් සහ නිරෝෂන් දික්වැල්ල ලකුණු 45 ක් රැස් කළා.

මැයි 15, 2024 - Sudarsha Warnakulasooriya

Other News Tab

ඔලිම්පික් වරම් අපේක්ෂාවෙන් යුපුන් අබේකෝන් හා කාලිංග කුමාරගේ යළි ජාත්‍යන්තර තරග බිමට..!!

ඔලිම්පික් වරම් අපේක්ෂාවෙන් යුපුන් අබේකෝන් හා කාලිංග කුමාරගේ පිළිවෙලින් අද හා හෙට යළි ජාත්‍යන්තර තරග බිමට එක්වනවා. ඉතාලියේ පැවැත්වෙන Rome Sprint Festival හි මීටර් 100 පිරිමි ඉසව්ව සඳහා එක්වන යුපුන් අබේකෝන් අද (18) ශ්‍රී ලංකා වේලාවෙන් රාත්‍රි 10.25ට තරග වැදීමට නියමිතයි. ජපානයේ පැවැත්වෙන Seiko Golden Grand Prix මලල ක්‍රීඩා තරගාවලියේ මීටර් 400 පිරිමි ඉසව්ව සඳහා කාලිංග කුමාරගේ සහභාගි වන අතර එම තරගය හෙට (19) ශ්‍රී ලංකා වේලාවෙන් උදෑසන 11.47ට ආරම්භ වනවා

මැයි 18, 2024 - Sudarsha Warnakulasooriya

ක්‍රීඩා ඔම්බුඩ්ස්මන්වරයා පත් කරයි..!!

ක්‍රීඩා ඔම්බුඩ්ස්මන්වරයා පත් කරයි. ක්‍රීඩා හා යෞවන කටයුතු අමාත්‍යවරයාට 1973 අංක 25 දරන ක්‍රීඩා පනතින් පැවරී ඇති බලතල අනුව හා පනතේ 31 වැනි වගන්තිය සමග කියවිය යතු 41 වන වගන්තිය යටතේ 2024.05.03 වන දිනැති හා අංක 2382/32 දරන අති විශේෂ ගැසට් පත්‍රයේ රෙගුලාසි අනුව ක්‍රීඩා ඔම්බුඩ්ස්මන්වරයා වශයෙන් ශ්‍රී ලංකා පරිපාලන සේවයේ විශේෂ ශ්‍රේණිධාරි (විශ්‍රාමික) ඩබ්.ඒ.චූලානන්ද පෙරේරා මහතා පත් කර ඇත. ඒ අනුව පනත ප්‍රකාරව ඔහුගේ රාජකාරි වනුයේ ලියාපදිංචි ජාතික ක්‍රීඩා සංගමයක/සම්මේලනයක යම් තීරණයකින් හෝ ක්‍රියාවකින් අගතියට පත් ඕනෑම තැනැත්තෙකු සම්බන්ධයෙන් ස්වාධීන සහ අපක්ෂපාතී පරීක්ෂණයක් පැවැත්වීමයි. අගතියට පත් පුද්ගලයා එවැනි තීරණයකින් හෝ ක්‍රියාවකින් දින 14 ක කාලයක් ඇතුළත ක්‍රීඩා ඔම්බුඩ්ස්මන් වෙත ලිඛිතව ඉල්ලීමක් ඉදිරිපත් කළ යුතුය. සාධාරණ හා අපක්ෂපාතී සමාලොචනයකින් පසුව, ක්‍රීඩා ඔම්බුඩ්ස්මන්වරයා විසින් එම ඉල්ලීම ලැබී දින 14 ක් ඇතුලත ක්‍රීඩා අධ්‍යක්ෂ ජනරාල් හරහා ක්‍රීඩා අමාත්‍යවරයා වෙත නිර්දේශ ඉදිරිපත් කළ යුතුය. ලියාපදිංචි ජාතික ක්‍රීඩා සංගමයක/සම්මේලනයක තීරණයක් හෝ ක්‍රියාවකට අදාළ යම් ආරවුලක් ඔම්බුඩ්ස්මන් වෙත යොමු කිරීම, ලියාපදිංචි ජාතික ක්‍රීඩා සංගමයක/ සම්මේලනයක තීරණයකට හෝ ක්‍රියාවකට අදාළව අභියාචනා උපදේශක කමිටුවවෙත කෙරෙන ඕනෑම අභියාචනයක් සදහා පුර්ව කොන්දේසියක් විය යුතුය. ඔම්බුඩ්ස්මන්වරයා විසින් නිර්දේශයක් කරන තුරු, එවැනි අභියාචනයක් අභියාචනා උපදේශක කමිටුව වෙත ඉදිරිපත් කළ යුතුවන කාල සීමාව අදාළ නොවේ. විෂයභාර අමාත්‍යවරයා හෝ අධ්‍යක්ෂ ජනරාල්වරයා ක්‍රීඩා ඔම්බුඩ්ස්මන්වරයාගේ නිර්දේශවලට බැදී නොසිටී. සෑම ජාතික ක්‍රීඩා සංගමයක්/සම්මේලනයක්ම ඔම්බුඩ්ස්මන්වරයාගේ සම්බන්ධීකරණ තොරතුරු සමග ඔම්බුඩ්ස්මන්වරයාගේ සේවය ලබා ගත හැකි බව එහි සාමාජිකයින්ට සහ ක්‍රීඩකයින්ට වාර්ෂිකව දැනුවත් කළ යුතුය.

මැයි 16, 2024 - Sudarsha Warnakulasooriya

මධ්‍යම ආසියානු වොලිබෝල් තරගාවලියේ, ඉරානය සමග පැවති තරගයේ, ජය වට 3-0 ක් ලෙස ශ්‍රී ලංකාවට..!!

මධ්‍යම ආසියානු වොලිබෝල් තරගාවලියේ, ඉරානය සමග අද පැවති තරගය, ජය ගැනීමට ශ්‍රී ලංකාව සමත් වුණා. තරගාවලියේදී ශ්‍රී ලංකාව වාර්තා කළ දෙවැනි ජයග්‍රහණය මෙයයි. තරගාවලිය, පකිස්තානයේ ඉස්ලාමාබාද් නුවරදී පැවැත්වෙනවා. ශ්‍රී ලංකාව සහ ඉරානය අතර තරගය, ආරම්භයේ සිටම ශ්‍රී ලංකාව දක්ෂ ලෙස ක්‍රීඩා කළා. ඔවුන් තරගයේ පළමු වටය ජය ගත්තේ, ලකුණු 25 ට 22 ක් ලෙසයි. දෙවැනි වටය ලකුණු 25 ට 17 ක් ලෙස ජය ගත් ශ්‍රී ලංකා ක්‍රීඩකයින්, තෙවැනි වටය ලකුණු 25 ට 21 ‍ලෙස ජය ගැනීමට සමත් වුණා. ඒ අනුව, ශ්‍රී ලංකාව තරගය ජය ගත්තේ, වට 3 ට බින්දුවක් ලෙසයි. ශ්‍රී ලංකා ක්‍රීඩකයින් මූලික වටයේදී සහභාගී වන අවසන් තරගය හෙට පැවැත්වීමට නියමිතයි. ඒ, ටර්ක්මින්ස්ථානය සමග. තරගාවලිය, මෙවර පැවැත්වෙන්නේ, දෙවැනි වරටයි.

මැයි 15, 2024 - Sudarsha Warnakulasooriya

Football News

FIFA SERIES 2024 SRI LANKA EDITION තරගාවලියේ භූතානය සහ ශ්‍රී ලංකාව අතර තරගයෙන් ගෝල 2-0 ක් ලෙස ජය ශ්‍රී ලංකාවට..!!

FIFA SERIES 2024 SRI LANKA EDITION තරගාවලියේ භූතානය සහ ශ්‍රී ලංකාව අතර තරගය කොළඹ ‍තුරඟ තරග පිටියේදී අවසන් වූයේ ගෝල 2-0 ක් ලෙස ශ්‍රී ලංකාවට ජය හිමි කර දෙමින්. තරගයේ පළමු අර්ධයේදී දෙපිළේ කිසිවකුටත් ගෝල වාර්තා කිරීමට හැකි වූයේ නැහැ. කෙසේ වෙතත් දෙවන අර්ධය ආරම්ක කර තත්පර 23ක් ගත වන විට ක්‍රියාත්මක වූ 21 හැවිරිදි ඩිලන් ද සිල්වා ශ්‍රී ලංකාවට පළමු ගෝලය වාර්තා කළා. අනතුරුව 55 වන මිනිත්තුවේදී ක්‍රියාත්මක වූ ඔලිව ජේම්ස් ශ්‍රී ලංකාව වෙනුවෙන් දෙවන ගෝලය ලබා දුන්නා. තරගයේ අවසාන මිනිත්තුව දක්වා ශ්‍රී ලංකා ක්‍රීඩකයින්ගේ ආක්‍රමණශීලී ක්‍රීඩා විලාශය නිසා භූතානයට කිසිදු ගෝලයක් වාර්තා කිරීමට හැකි වූයේ නැහැ. ජාත්‍යන්තර පාපන්දු ශ්‍රේණි ගත කිරීම් අනුව භූතානයට 184 වන ස්ථානයත් ශ්‍රී ලංකාවට 204 වන ස්ථානයත් හිමි වී තිබෙනවා. ශ්‍රී ලංකාව මෙම වාර්තා කළ ජයග්‍රහණය වසර 3 කට පසුව ලැබූ පළමු ජාත්‍යන්තර ජයග්‍රහණයයි. මේ අතර ශ්‍රී ලංකාව භූතානයට එරෙහිව තරගයක් ජය ගත්තේ වසර 10 කට පසුව වීම විශේෂත්වයක්.

මාර්තු 26, 2024 - Sudarsha Warnakulasooriya

අප්‍රිකානු කුසලාන පාපන්දු තරගාවලියේ ශූරතාවය අයිවරි කෝස්ට් කණ්ඩායමට..!!

අප්‍රිකානු කුසලාන පාපන්දු තරගාවලියේ ශූරතාව හිමි කර ගැනීමට අයිවරි කෝස්ට් කණ්ඩායම සමත් වුණා. ඒ, ඊයේ පැවති අවසන් තරගයේදී, නයිජීරියාව පරාජය කරමින්. තරගාවලිය පැවැත්වුණේ, අයිවරි කෝස්ට් හිදී. අවසන් තරගයේ පළමු ගෝලය 38 වැනි මිනිත්තුවේදී වාර්තා කළේ, නයිජීරියාවයි. ඒ අනුව, පළමු අර්ධය නිමා වන විට ගෝල 1 ට 0 ක් ලෙස පෙරමුණ ගැනීමට නයිජීරියාව සමත් වුණා. දෙවැනි අර්ධයේදී අයිවරි ‍කෝස්ට් කණ්ඩායම ගෝල 2 ක් ලබා ගත්තා. ඒ, 62 වැනි සහ 81 වැනි මිනිත්තුවලදී. නමුත්, නයිජීරියාව දෙවැනි අර්ධයේදී ගෝලයක් වාර්තා කළේ නැහැ. ඒ අනුව, ගෝල 2 ට 1 ක් ලෙස තරගය ජය ගත් අයිවරි කෝස්ට් කණ්ඩායම තරගාවලියේ ශූරතාව හිමි කර ගත්තා. ඔවුන් මෙම ශූරතාව දිනූ තෙවැනි අවස්ථාව මෙයයි.

පෙබරවාරි 12, 2024 - Sudarsha Warnakulasooriya